Nur-Sultan ákimdiginiń ókilderi azamattardy jeke suraqtarymen apta saiyn qabyldaityn bolady. Bul týraly elorda ákimi Altai Kólginov Instagram-paraqshasynda jazdy, dep habarlaidy "Ult aqparat".
«2021 jyly azamattardy apta saiyn qabyldaityn bolamyz. Búgin 10-nan astam turǵyndy onlain qabyldadym.
Prezident VII shaqyrylymdaǵy Parlamenttiń alǵashqy sessiiasynda sóilegen sózinde memleket óz jumysynda áleýmettik álsiz toptardy qoldaýǵa basymdyq berýi kerektigin, «ataýly memlekettik kómek pen ony alý sharttary kúsheitilýi tiistigin« aitty. Azamattardy qabyldaý – kóbirek adamdy áleýmettik kómekpen qamtýǵa, máselelerdi júieli túrde sheshýge múmkindik beredi», - dedi elorda basshysy.
A.Kólginovtiń aitýynsha, qala turǵyndary kóbine turǵyn úi jáne áleýmettik kómekke qatysty júginedi.
«Ótken jyldyń kúzinde turǵyn úi salasynda qyzmet kórsetetin biryńǵai ortalyq osy sebepti ashyldy (Respýblika dańǵyly, 32). Onda – turǵyn úi kezeginiń nómiri, kezekke turý tártibi, túrli turǵyn úi baǵdarlamalaryna qatysý joldary jáne sol siiaqty ózge de aqparat alýǵa bolady.
Áleýmettik máseleler boiynsha kómek kórsetýge «Januia« otbasy institýtyn qoldaý ortalyǵy (Beibitshilik kóshesi, 14) bar. Onda «bir tereze« qaǵidaty boiynsha qala turǵyndaryna 70-ten astam memlekettik qyzmet kórsetiledi. Ashylǵan sátten bastap (2019 jylǵy tamyz aiy) - 41,5 myńnan astam adam júginip, ózderin tolǵandyrǵan máselelerge qatysty keńes aldy.
Osylaisha, qabyldaýǵa kelgen azamattardyń bir bóliginiń máselelerin sheshý – basqa sanattaǵy qala turǵyndarynyń da máselelerin sheshýge múmkindik berdi», - dep jazdy Nur-Sultan qalasynyń ákimi.
