Latyn álipbiine kezeń-kezeń boiynsha kóshýdiń jospary negizinde 2021 jyldan bastap, qazaqstandyqtardyń tólqujatyn, jeke kýálikteri men basqa da qujattaryn latyn grafikasy negizinde memlekettik tilde berý kózdelýde. Bul týraly búgin Úkimet otyrysynda Mádeniet jáne sport vitse-ministri Erlan Qojaǵapanov málim etti, dep habarlaidy "Ult aqparat" QazAqparatqa silteme jasap.
«Memleket basshysynyń keńeitilgen Úkimet otyrysynda bergen tapsyrmalaryna qatysty kelesini baiandaýdy ruqsat etińiz. Latyn álipbiine kezeń-kezeń boiynsha kóshýdiń jospary ázirlendi. Birinshi kezeń - 2018-2020 jyldary normativtik-quqyqtyq bazany jetildirý boiynsha daiyndyq jumystary men is-sharalar júrgiziletin bolady. Latyn grafikasy negizinde jańa qazaq álipbiinde durys jazý qaǵidalary, mátindi latyn álipbiine aýdarýdyń IT qosymshalary ázirlenedi», - dedi vitse-ministr.
Erlan Qojaǵapanov ekinshi kezeń 2021-2023 jyldardy qamtitynyn atap ótti.
«2021-2023 jyldary latyn grafikasy negizinde memlekettik tilde Qazaqstan Respýblikasynyń tólqujatyn, jeke kýáligin jáne basqa da qujattardy berýdi qamtamasyz etý kózdelgen. Filologtar men ǵalym-lingvisterdi tarta otyryp, ortalyqtardyń oqytýshylary men eresek halyqty úiretý úshin seminarlar men lektsiialar, kýrstar uiymdastyrylady. Úshinshi kezeń 2024-2025 jyldary memlekettik organdarynyń, bilim berý uiymdarynyń, memlekettik BAQ jáne baspalardyń qujat ainalymdaryn kezeńmenen kóshirý josparlanǵan. Ministrlik janynda jumysty úilestirý maqsatynda «Til qazyna» ortalyǵy qurylýda», - dep túidi Erlan Qojaǵapanov.
