2021 jyldyń 1 qańtarynan bastap Almaty qalasynda alǵash ret aýadaǵy ozon mólsheri ólshenetin bolady, dep habarlaidy "Ult aqparat".
«Kazgidromet» RMK baspasóz qyzmetiniń málimetinshe, 2013 jyly Finliandiia meteorologiialyq institýty júrgizgen birlesken ekonomikalyq zertteý baǵdarlamasynyń usynymy negizinde «Qazgidromet» RMK qalalar men eldi mekenderde atmosferalyq aýadaǵy ozon mólsheriniń baqylaý jelisin keńeitý jumysyn júrgizdi.
Kelesi jyldan bastap Almatyda ozonnyń mólsheri tórt avtomatty baqylaý beketinde ólshenedi.
Olar myna mekenjaida ornalasqan:
- Ahmetov kóshesi, 50, aerologiia stansasy (áýejai aýdany);
- R. Zorge kóshesi,14, Túrksib aýdanynyń AIIB;
- Janqoja batyr kóshesi, 202, «Shańyraq» shaǵynaýdany, №26 mektep;
- ál-Farabi dańǵyly, Naýai kóshesiniń qiylysy, «Orbita» shaǵynaýdany («Zelenstroi»AQ dendropark aýmaǵy).
Sonymen qatar, 2021 jyldyń 1 qańtarynan bastap aýadaǵy ozon kontsentratsiiasyn baqylaý Nur-Sultan, Shymkent, Óskemen, Atyraý, Taraz, Oral, Qaraǵandy, Qostanai, Qyzylorda, Aqtaý, Petropavl, Túrkistan, Pavlodar, Aqsai, Qulsary, Jańaózen qalalarynda, sondai-aq Beineý kentinde jáne «Býrabai» fondyq monitoring stansasynda júrgizile bastaidy.
«Aldaǵy ýaqytta ozon kórsetkishin «AirKz» mobildi qosymshasynan jáne «Qazgidromet» RMK interaktivti kartasynan kórýge bolady» delingen habarlamada.
