Ótken jyly 5,7 mln-nan astam jol qozǵalysy erejesin buzý faktisine jol berilmedi. Bul týraly QR Ishki ister ministrliginiń resmi ókili Nurdildá Oraz aitty, dep habarlaidy QazAqparat.
Resmi ókildiń aitýynsha, Ishki ister ministrliginiń alqa májilisinde jol qaýipsizdigin qamtamasyz etý taqyryby kóterildi.
Politsiianyń el joldarynda baqylaýdy kúsheitetini atap ótildi.
«Jol qozǵalysy erejelerin buzýdy tirkeý júieleriniń jelisin keńeitý jáne intellektýaldy kameralardy engizý boiynsha sharalar qabyldanýda. Ótken jyly 5,7 mln-nan astam jol qozǵalysy erejelerin buzýshylyqqa jol berilmedi. Onyń 2,6 mln-y avtomatty tirkeý júiesiniń kómegimen anyqtaldy. Joldardyń apatty jáne qaýipti ýchaskelerin tekserý boiynsha jumys jandandyryldy. Jol infraqurylymyn jaqsartý maqsatynda jaýapty tulǵalarǵa 25 myńnan astam nusqama berildi», - dedi ol.
Onyń atap ótýinshe, jol jaǵdaiy qolaisyz nemese kóliktiń tehnikalyq jai-kúii sáikes kelmegen jerlerde politsiia qyzmetkerleri joldy nemese kólikti kútip ustaýǵa jaýapty adamdarǵa qatań shara qoldanady.
Jergilikti atqarýshy organdarmen birlesip kósheler men joldardy qorshaýmen, jaiaý júrginshiler ótkelimen, qosymsha baǵdarshammen, jol belgilerimen, apattyq bailanyspen jabdyqtaý sharalaryna erekshe kóńil bólinedi.
«Avtopatrýl arqyly jol qozǵalysyn qadaǵalaýdy eki myńǵa jýyq ekipaj júzege asyrady. Ótken jyly atqarylǵan jumystyń nátijesinde jol-kólik oqiǵalarynyń sany - 18,7 paiyzǵa, onda qaza tapqandar - 17 paiyzǵa jáne zardap shekkender - 19,5 paiyz qysqardy», - dedi Nurdildá Oraz.
