2020 jyly jalpy ishki ónimniń ósý qarqyny minýs 2,6 paiyzdy qurady. Bul týraly Úkimet otyrysynda QR Ulttyq ekonomika ministri Rýslan Dálenov aitty, dep habarlaidy QazAqparat.
«2020 jyly naqty sektor ekonomikalyq draiver boldy. Ondaǵy ósý 2 paiyzdy qurady. Kórsetiletin qyzmetter úshin ótken jyl minýs 5,6 paiyzben aiaqtaldy. Degenmen sońǵy ailarda qarqyn qalpyna kele bastady. Nátijesinde, jalpy ishki ónimniń ósý qarqyny minýs 2,6 paiyzdy qurady. Bul 11 aidyń deńgeiinen joǵary. Naqty sektor salalarynyń kóbi jáne jekelegen qyzmet túrleri ósýdi kórsetti. Olar: qurylys, aqparat jáne bailanys, aýyl sharýashylyǵy óńdeý ónerkásibijáne bilim berýsalalary. Sondai-aq, keibir salalardaǵy teris ósýge qaramastan, jyl sońyna qarai serpin jaqsardy. Olar: kólik, saýda, ǵylymi jáne tehnikalyq qyzmet, jyljymaityn múlikpen operatsiialar jáne ken óndirý ónerkásibi», - dedi ministr.
Onyń atap ótýinshe, 2020 jyly ekonomikany qoldaý sharalary jumyspen qamtý men iskerlik belsendilikti saqtaýǵa yqpal etti. Jumys oryndaryn saqtaý jáne qurý úshin Jumyspen qamtýdyń jol kartasy iske asyrylýda. Zardap shekken salalar úshin salyqtyq yntalandyrý sharalary qabyldandy.
Shaǵyn jáne orta biznesti jeńildikpen kreditteý quraldary aitarlyqtai keńeitildi. Ainalym kapitalyn qarjylandyrý ulǵaityldy. Jeńildikti sharttarmen kreditterdi qaita qarjylandyrý, sondai-aq kreditter boiynsha tólemderdi keiinge qaldyrý usynyldy. Biýdjettik jáne memlekettik basqarýdyń ikemdiligi qamtamasyz etildi. Biýdjettik yntalandyrý artty. Nátijesinde, jumyspen qamtý sharalarymen 1,4 mln adam qamtyldy, onyń ishinde 238 myń adam Jumyspen qamtýdyń jol kartasy aiasynda. 700 myń kásipkerge salyqtyq jeńildikter berildi. Zardap shekken salalardaǵy qaryz alýshylardyń 80 paiyz kredittik tólemderin keiinge qaldyrdy. Kásipkerlerdiń 40 myńǵa jýyq jobasy tómendetilgen mólsherlememen qarjylandyryldy», - dedi ministr.
