2020 jylǵy qańtar-jeltoqsan ailarynda respýblikalyq biýdjetten 366 mlrd teńgeden astam qarajat, onyń ishinde múgedektigi boiynsha memlekettik áleýmettik járdemaqy tóleýge – 291 mlrd teńgeden astam qarajat, asyraýshysynan aiyrylý jaǵdaiyna – 75 mlrd teńge tólendi, dep habarlaidy QR Eńbek jáne halyqty áleýmettik qorǵaý ministrliginiń baspasóz qyzmeti.
2021 jylǵy 1 qańtardaǵy jaǵdai boiynsha múgedektigi boiynsha memlekettik áleýmettik járdemaqy alýshylardyń sany shamamen 525 myń adamdy, asyraýshysynan aiyrylý jaǵdaiy boiynsha járdemaqy alýshylardyń sany 166 myń adamdy quraidy.
Múgedektigi boiynsha memlekettik áleýmettik járdemaqylardyń mólsheri múgedektik tobyna jáne sebebine, sondai-aq tiisti qarjy jylyna arnalǵan «Respýblikalyq biýdjet týraly» zańda belgilengen eń tómen kúnkóris deńgeiiniń shamasyna bailanysty bolady.
Mysaly, 2020 jylǵy 1 sáýirden bastap jalpy aýrýdan bolǵan I toptaǵy múgedektik boiynsha memlekettik áleýmettik járdemaqy mólsheri 62 723 teńge, II topqa – 49 983 teńge, III topqa – 33 975 teńge, 16 jasqa deiingi múgedek balalarǵa – 45 736 teńge boldy.
Asyraýshysynan aiyrylý jaǵdaiy boiynsha memlekettik áleýmettik járdemaqylardyń mólsheri qaitys bolǵan (qaza tapqan) asyraýshynyń asyraýyndaǵy adamdardyń sanyna, qaitys bolý sebebine jáne eń tómengi kúnkóris deńgeiine bailanysty.
Mysaly, 2020 jylǵy 1 sáýirden bastap asyraýyndaǵy bir adamnyń asyraýshysynan aiyrylý jaǵdaiy boiynsha memlekettik áleýmettik járdemaqy mólsheri 28 095 teńgeni, asyraýyndaǵy eki adamnyń járdemaqysy 48 676 teńgeni qurady.
