2020 jyly Qazaqstanda 1,3 millionnan astam avtokólik tirkeýge qoiyldy. Bul týraly «QazAvtoÓnerkásip» avtokólik salasyndaǵy kásiporyndar odaǵynan málim etti, dep habarlaidy "Ult aqparat".
«Esepti kezeńde ákimshilik politsiia organdary 1 369 668 avtokólikti tirkeýge qoidy. Atalǵan kórsetkish ótken jyldyń sáikes kezeńinen 8,2 paiyzǵa kem. Onyń ishinde 1 223 677-si birneshe ret tirkelgender úlesinde, iaǵni bir adamnan ekinshi adamnyń atyna aýystyrylǵan kólikter sanatyna jatqyzyldy. Bir jyl burynǵy deńgeimen salystyrǵanda 11,7 paiyzǵa tómendedi. Al alǵash ret tirkelgen kólik quraldarynyń sany artyp, 145 991-di qurady. Bul kórsetkish byltyrǵa qaraǵanda 30,8 paiyz joǵary. Osy kórsetkishke 2020 jyly bastapqy ári ýaqytsha tirkeýge qoiylǵan Armeniiadan jetkizilgen 17 398 jeńil avtokólik enip otyr», - dep atap kórsetilgen taratylǵan málimette.
2020 jyldyń qorytyndysy boiynsha Qazaqstan aýmaǵynda 73 jeńil elektromobil tirkelgen.
«QazAvtoÓnerkásiptiń» habarlaýynsha, esepti kezeńde qaita tirkelgen kólikterdiń úshten ekisinen astamyn (66,9 paiyzy) paidalaný merzimi 10 jyldan asqan kólikter qamtyǵan.
Atap aitqanda, 20 jyldan asqandardyń úlesi – 502 798 kólik (41,1 paiyz) bolsa, 11-den 20 jylǵa deiingiler – 25,9 paiyz (316 377 kólik).
Al 4-ten 7 jylǵa deiingiler – 210 415 kólikke (17,2 paiyz), 8-den 10 jylǵa deiingiler – 121 395 kólikke (9,9 paiyz), 1-den 3 jylǵa deiingi kólik sany 60 605-ke jetti. Sonymen qatar, paidalaný merzimi 1 jylǵa jetpegen kólikterdiń úlesi 1 paiyz (12 087 avtomobil) boldy.
