2020 jyly Eýraziialyq ekonomikalyq odaq elderindegi ózara saýda-sattyq kólemi 11 paiyzǵa qysqardy.
Bul týraly Eýraziialyq ekonomikalyq komissiianyń integratsiia jáne makroekonomika jónindegi múshesi (ministri) Sergei Glazev aitty, dep habarlaidy QazAqparat.
«Búkil álemdegidei bizge de pandemiialyq shekteýler ózara saýda-sattyqqa teris áserin tigizdi. Bul irkilester, eń aldymen kólik qatynasynyń qiyndaýyna bailanysty boldy. Eger qańtardan qarashaǵa deiingi aralyqty alar bolsaq, ózara saýda-sattyq kólemi 11 paiyzǵa qysqaryp, 44 mlrd dollardy qurady. Ózara saýda-sattyq kólemi syrtqy saýdaǵa qaraǵanda birshama az qysqardy», - dedi ol Ortalyq kommýnikatsiialar qyzmetiniń kóshpeli baspasóz máslihaty barysynda.
Onyń atap ótýinshe, strategiialyq sharalardy júzege asyrýdyń arqasynda EAEO elderi saýda-sattyq kólemin tez arada qalpyna keltire aldy.
«Ózara saýda-sattyqqa valiýta baǵamynyń qubylýy da áser etti. Eger, ózara saýda-sattyqtaǵy ártúrli elderdiń salmaǵy jaiynda aitar bolsaq, bul rette ósim qarqyny, taýar ainalymy dinamikasy turǵysynda Qazaqstannyń jaǵdaiy birshama tabysty boldy jáne kólik irkilesteri men suranys qurylymyndaǵy qubylmalyq birshama tómen baiqaldy», - dedi ol.
EEK ministri EAEO elderinde keibir salalarda ósim baiqalǵanyn da atap ótti.
«Mundai birneshe sala bar. Ózderińiz de bilip otyrǵandai, birinshi orynda farmatsevtika tur. 11 aidaǵy málimetterge sáikes, sala 22-23 paiyzǵa ósti. Aita keterligi, Qazaqstanda eki ese ósim bar, sala 45 paiyzǵa artyp otyr. Himiia ónerkásibi shamamen 5 paiyzǵa toqyma ónerkisibi 10-12 paiyzǵa artsa, tamaq ónerkásibinde de aitarlyqtai ósim tirkeldi. Aýyl sharýashylyǵynyń jekelegen salalarynda atap aitqanda sút pen mai, irimshik óndirisinde ósim bar», - dedi Sergei Glazev.
