QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda Jumyspen qamtýdyń jol kartasyn iske asyrý máseleleri qaraldy. Eńbek jáne halyqty áleýmettik qorǵaý ministri Birjan Nurymbetov eldegi qazirgi jaǵdai týraly baiandama jasady, dep jazady primeminister.kz.
Ministrdiń aitýynsha, koronavirýs pandemiiasy ekonomikaǵa jáne eńbek naryǵyna teris áser etýde. Osyǵan bailanysty Úkimet qabyldap jatqan mańyzdy sharalardyń biri — jańa «Jumyspen qamtýdyń jol kartasy».
«Baǵdarlamanyń negizgi sharttary – qyzmet kórsetýshilerdiń jáne paidalanatyn qurylys materialdarynyń kem degende 90%-y otandyq óndirýshiler men merdigerlerden bolýy tiis, qurylyp jatqan jumys oryndaryna jumyssyz júrgen, ásirese jumyssyz jastardyń kem degende 50%-y jumyspen qamtý ortalyqtary arqyly tartylýy tiis», — dedi B. Nurymbetov.
Jalpy ákimder «Jumyspen qamtýdyń jol kartasy» aiasynda 6 506 jobany usyndy. Onyń ishinde 2 703 joba — áleýmettik infraqurylymǵa, 1 039 joba — turǵyn-úi sharýashylyǵyna, 1 799 joba — injenerlik-kólik infraqurylymyna jáne 695 joba eldi mekenderdi abattandyrýǵa qatysty.
Atalǵan jobalardy iske asyrý aiasynda barlyǵy 255 myń jumys orny qurylady. Iske asyrylǵan jobalar ekonomikanyń túrli salalarynda 100 myńnan astam turaqty jumys oryndaryn qurýǵa yqpal etedi.
«Jol kartasynda iriktelgen jobalar ýaqytsha jumyspen qatar áleýmettik mańyzdy máselelerdi sheshýge, ekonomikalyq tiimdilikti arttyrýǵa, aralas salalardy damytýǵa, turaqty jumys oryndaryn qurýǵa yqpal etedi», — dep atap ótti ministr.
Sonymen qatar, «Jol kartasy» aiasynda 80 jańa bilim berý mekemesi salynady. Óz kezeginde, bul apatty jáne úsh aýysymdy mektepterdiń problemasyn sheshýge, aýyldaǵy balalardyń bilim alýyn qamtamasyz etýge, muǵalimderge 7 myń jańa jumys ornyn ashýǵa múmkindik beredi. Jańa otbasylyq dárigerlik ambýlatoriialar aýyldyq jerlerdegi halyqtyń densaýlyǵyn jaqsartýǵa, meditsinalyq saqtandyrý júiesin jetildirýge, aýyldyq jerlerde dáriger-mamandardyń turaqty jumyspen qamtylýyn qamtamasyz etýge jol ashady.
Budan ózge, birqatar oblystarda jumys istep turǵan sýarmaly keshenderdi qaita jańartý sýarmaly jerlerdiń kólemin ulǵaitýǵa, halyqtyń eginshilikpen, mal sharýashylyǵymen ainalysý múmkindikterin keńeitýge jol ashady. Esep boiynsha, atalǵan jobalar aralas salalarda 77 myń turaqty jumys ornyn ashýǵa múmkindik beredi.
«Barlyq 6 506 jobanyń 2 410-y respýblikalyq biýdjette qarastyrylǵan qarajat esebinen iske asyrylýda. 1 mamyrdaǵy jaǵdai boiynsha memlekettik satyp alý boiynsha konkýrstar aiaqtaldy, 1 779 joba boiynsha (nemese 73,8%) merdigerler anyqtaldy», — dedi B. Nurymbetov.
Bul baǵytta Jambyl, Shyǵys Qazaqstan, Pavlodar, Qaraǵandy, Almaty, Túrkistan oblystary alda keledi. Birqatar óńirlerde 1 265 joba boiynsha jumys bastaldy, 17 myńnan astam jumys orny quryldy, 10 332 jumysshy qabyldandy.
QR Eńbek jáne halyqty áleýmettik qorǵaý ministrligi «Jol kartasyn» iske asyrý monitoringiniń tetigin ázirledi. Árbir oblys, qala, aýdan jáne aýyl boiynsha esep júrgiziledi, árbir joba boiynsha onyń «pasporty» ázirlendi. «Pasportta» jobanyń ataýynan bastap, onyń maqsaty, qol jetkizý tiisti túpkilikti josparly kórsetkishi, oryndalý merzimi, merdiger týraly málimetter, qurylatyn jumys oryndarynyń sany, jumyspen qamtý ortalyǵy arqyly qabyldanǵandardyń jalaqy mólsheri kórsetiledi.
Búgingi barlyq baǵdarlamalardyń áleýetin eskere otyryp, 2020 jyly 1 mln 220 myń adamdy jumysqa tartýǵa múmkindik bar.
