Premer-Ministr Asqar Maminniń tóraǵalyǵymen ótken QR Úkimetiniń otyrysynda QR tsifrlyq damý, innovatsiialar jáne aeroǵarysh ónerkásibi ministriniń mindetin atqarýshy – birinshi vitse-ministr Baǵdat Mýsin Memleket basshysynyń 2020 jylǵy 1 qyrkúiektegi Joldaýyn iske asyrý boiynsha tsifrlandyrý bóliginde atqarylyp jatqan jumystar týraly baiandady.
Prezident Qasym-Jomart Toqaev «Jańa jaǵdaidaǵy Qazaqstan: is-qimyl kezeńi» Joldaýynda tsifrlyq teńsizdikti joiý, internetke barynsha qol jetkizýdi jáne barlyq azamattardy sapaly bailanyspen qamtamasyz etý qajettigine erekshe nazar aýdardy.
Mýsin búgingi tańda qazaqstandyqtardy sapaly internetpen qamtamasyz etý boiynsha eki joba iske asyrylyp jatqanyn atap ótti, olar: aýyldyq eldi mekenderde talshyqty-optikalyq bailanys jelilerin salý jáne internetke mobildi keńjolaqty qosylý, olar osy jyldyń sońyna deiin aiaqtalady. Bul 250-den astam turǵyny bar barlyq aýyldardy sapaly internetpen qamtamasyz etedi. Sondai-aq bailanys sapasyn arttyrý úshin mynadai sharalar qabyldanady:
- bailanys sapasynyń parametrleri aiqyndalady;
- internet sapasy boiynsha derekterdi tirkeýge jáne berýge múmkindik beretin Halyqtyq baqylaý quraly engiziledi;
- bailanys operatorlaryna qoiylatyn talaptardy arttyrý boiynsha birqatar basqa da zańnamalyq túzetýler pysyqtalady.
Sonymen qatar Memleket basshysy óziniń jyl saiynǵy joldaýynda jyl sońyna deiin asa suranysqa ie anyqtamalar men qaǵaz rastaýlardy alyp tastaýdy, aqparatty tsifrlyq rastaýdy qamtamasyz etýdi tapsyrdy. Halyqtyń elektrondyq servistermen ózara is-qimylyn jeńildetý úshin memlekettik qyzmetter deńgeiinde jáne jeke bizneste biometriiany keńinen qoldaný qajet ekendigi atap ótildi.
Mýsinniń aitýynsha, QR TsDIAÓM qyzmet alýshylardyń Egov-ta bir qadam arqyly tirkelýin júzege asyrýda. Bul qoldanýshylarǵa biometriialyq sáikestendirýden ótip, kez-kelgen qyzmetke qol qoiýǵa múmkindik beredi.
«Sonyń nátijesinde, kóptegen adamdar Egov qyzmetterin paidalana alatyn bolady. Onlain-kommertsiialyq qyzmetterdi damytý úshin bizneske de senimdi biometriialyq qural usynylady. Azamat paidalanýshy bolǵannan keiin tsifrlyq qujat qyzmetin qaǵaz qujattarmen teń qoldana alady», — dedi ministr mindetin atqarýshy.
Jyl sońyna deiin júrgizýshi kýáligin, kóliktiń tehnikalyq tólqujatyn, azamattyń tólqujatyn, joǵary bilim týraly diplomdy, stýdenttik biletti, saqtandyrý polisin shyǵarý josparlanýda.
Sondai-aq jyl sońyna deiin 30-ǵa jýyq suranysqa ie anyqtama alyp tastalady. Shynaiylyqty rastaý QR kodty oqý arqyly qamtamasyz etiletin bolady.
Mýsin Qasym-Jomart Toqaevtyń aitýynsha jańa deńgeige shyǵýy tiis «derektermen» júrgizilip jatqan jumys týraly tolyǵyraq aityp berdi.
«Biz bir jyl ishinde etalondyq derekterdiń biryńǵai arhitektýrasyn ázirleimiz. Smart Data Ukimet memlekettik organdardyń vedomstvoaralyq taldaý júiesi retinde jetildiriledi. Aqaýǵa tózimdilikti qamtamasyz etý úshin biz «Ulttyq aqparattyq tehnologiialar» aktsionerlik qoǵamy tulǵasyndaǵy derekter operatorynyń infraqurylymynda aqparattyq júielerdi shoǵyrlandyrýdy jalǵastyramyz. Atalǵan maqsattar úshin memlekettik data ortalyqty damytý usynylady», — dedi ol.
QR TsDIAÓM taldaýy kórsetkendei, otandyq AT-ónimder memlekettik jáne kvazimemlekettik satyp alýlardaǵy halyqaralyq analogtardy jylyna 56 mlrd teńgege almastyra alady. Ol úshin senimdi otandyq baǵdarlamalar tiziliminiń tetigi bar. Bul tizimnen satyp alý basym tártippen júrgizilýi tiis. Al basqa jekemenshik naryqtarda otandyq AT-ónimderdiń áleýeti 142 mlrd teńgeni quraidy.
«Osy sandarǵa qol jetkizý úshin bizge offteik kontrakttar, nesieler alýǵa kredittik garantiialar jáne taǵy basqa qural túrlerin damytý qajet. Atalǵan nátijelerge qol jetkizgen soń sheteldik naryqqa da shyǵýǵa umtylatyn bolamyz», — dedi Mýsin.
Qasym-Jomart Toqaev Joldaýda bes jyl ishinde maining indýstriiasy men data-ortalyqtarǵa salynatyn investitsiia kólemin 500 mlrd teńgege deiin jetkizý kerektigin atap ótti.
Búgingi tańda Qazaqstanda 13 maining fermasy jumys isteidi (620 MVt tutynatyn). Sondai-aq 4 ferma (450 MVt jýyq) salynyp jatyr. Bul salaǵa 80 mlrd astam teńge investitsiia tartylǵan. Qazirgi tańda taǵy da 300 mlrd teńgege investitsiia tartý boiynsha aldyn ala kelisimder bar. Al 2025 jylǵa qarai investitsiia kólemi shamamen 500 mlrd teńgeni quraýy josparlanýda.
QR TsDIAÓM osy baǵyttaǵy jumystardy qarqyndy ári qarai jalǵastyrýdy kózdep otyr.
