2020 jyldyń qorytyndysynda óńdeý ónerkásibinde oń úrdis saqtaldy. Bul týraly Úkimet otyrysynda QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«2020 jyldyń qorytyndysynda óńdeý ónerkásibinde oń úrdis saqtaldy. Mashina jasaý salasy 116,3 paiyz deńgeiinde turaqty ósim kórsetti. Avtokólik quraldary, treilerler jáne jartylai tirkemeler, ózge kólik quraldaryn, elektr jabdyqtaryn jasaý, mashinalar men jabdyqtar óndirisi ósti. Tústi metallýrgiiada da oń dinamika baiqaldy. Ósim - 2,8 paiyz. Oǵan tazartylǵan altyn, quima altyn óndirý, túiirshikterdegi kúmis, «Dore» qorytpasy, bastapqy aliýminii óndirisi jáne basqa da kórsetkishterdiń ósimi esebinen qol jetkizildi», - dedi ministr.
Onyń aitýynsha, qara metallýrgiiada ósim 4,1paiyz boldy. Armatýra prokaty, relster, ferro-siliko-marganets, armatýralar, sharlar jáne domalaq shybyqtardyń taýar óndirisi ósti.
«Farmatsevtika ónerkásibi ishki naryqtyń eń qajetti ónimderge suranysyn tolyq ótep, óndiris kólemi 47 paiyzǵa artty. Jeńil ónerkásipte óndiris 15 paiyzǵa ósti. Bul toqyma buiymdary óndirisiniń, kiimniń jáne bylǵary ónimderdiń ulǵaiýyna bailanysty boldy. Aǵash jáne tyǵyn buiymdary óndirisiniń ósimi 43, paiyzdy qurady. Qurylys materialdary óndirisi 1,8 paiyzǵa artty. Óńdeý ónerkásibindegi oń dinamikaǵa pandemiia kezeńinde Úkimet qabyldaǵan qoldaý sharalary, shaǵyn jáne orta biznestiń turaqty damýy esebinen qol jetkizildi», - dedi Beibit Atamqulov.
