2019 jyldyń 1 qańtarynan bastap jalaqysy tómen azamattardyń tabys salyǵy 10 esege azaiady. Bul týraly búgin QR Parlamenti palatalarynyń birlesken otyrysynda Memleket basshysy Nursultan Nazarbaev aitty, dep habarlaidy QazAqparat tilshisi.
«Barshańyzdy jańa parlamenttik maýsymnyń bastalýymen quttyqtaimyn. Sizder jazda óńirlerdi aralap, eldiń tynys-tirshiligimen jetik tanystyńyzdar. Halyqty ne tolǵandyratynyn, qandai máseleler bar ekenin kózben kórip, bilip keldińizder. Ol barsha qazaqstandyqtardyń ál-aýqatyn jaqsartý jolyndaǵy qyzmetterińizge qajet. Kezek kúttirmei qolǵa alynýǵa tiisti mańyzdy jumystar qazirdiń ózinde jetkilikti. Qos palatanyń birlesken otyrysynda basymdyqtardy aiqyndap, birden iske kirisýimiz kerek. Strategiialyq nysana bárimizge belgili. Ol ózimiz qabyldaǵan 2050-shi deiingi strategiianyń negizgi alǵa qoiǵan maqsaty 30 eldiń qataryna qosylý - bizdiń ainymas mejemiz. Dáiekti saiasat pen keshendi sharalar júrgizip, maqsatty túrde alǵa basyp kelemiz», - dedi Elbasy.
Osy rette Memleket basshysy bes áleýmettik basymdyqty jariia etkenin, Parlament pen Úkimet birlesip, jumys istep, ony júzege asyrýǵa qajetti barlyq zańnamalardyń alǵashqy sharttaryn jasaǵanyn aitty.
«7-20-25» baǵdarlamasy boiynsha alǵashqy nesieler berile bastady. Qosymsha 20 myń bilim granty berildi. 70 myń oryndyq jataqhana qurylysyna daiyndyq aiaqtaldy, kei óńirlerde bastaldy. Jańa jyldan bastap jalaqysy tómen azamattardyń tabys salyǵy 10 esege azaiady. Jeke is bastaýǵa beriletin nesieler kólemi 62 mlrd teńgege kóbeidi. Saryarqa gaz qubyry qurylysyna daiyndyq jumystary aiaqtalyp qaldy. Osylaisha men jariialaǵan áleýmettik jańǵyrýdyń taǵy bir baǵdarlamasyn iske asyrýdyń barlyq negizi qalandy. Osyny baqylap, ýaqytynda iske asyrý baǵytynda jumys jasaýmymyz kerek», - dedi Nursultan Nazarbaev.
