Joǵary oqý oryndarynyń akademiialyq jáne basqarý derbestigin keńeitý aiasynda 2019 jyldan bastap memlekettik bilim granttary bilim baǵdarlamalarynyń toptary boiynsha taǵaiyndalatyn bolady. Sondai-aq, mamandardy daiarlaý baǵyttarynyń jańa klassifikatory engizilip otyr, dep habarlaidy "Ult aqparat" Bilim jáne ǵylym ministrliginiń baspasóz qyzmetine silteme jasap.
Búgingi kúnge deiin elimizdiń joǵary oqý oryndarynda mamandyqtar tizimi naqty kórsetilgen klassifikator paidalanyldy. 2019 jyldan bastap jańa klassifikator engiziledi. Onda mamandyqtardyń naqty tizimi emes, mamandardy daiarlaý baǵyty kórsetiletin bolady. Sáikesinshe, elimizdiń joǵary oqý oryndary derbes bilim baǵdarlamalaryn jasap alady.
«Osyǵan orai, memlekettik bilim granttary bilim baǵdarlamalarynyń toptary boiynsha taǵaiyndalady. Máselen, «Matematika páni muǵalimderin daiarlaý» tobyna «Matematika», qosarlanǵan «Matematika-Fizika», «Matematika-Informatika» mamandyqtary kiredi. Al, «Aqparattyq tehnologiialar» tobyna - «Informatika», «Aqparattyq júieler» jáne taǵy basqalary enedi. Iaǵni, bilim granttarynyń taǵaiyndalýy burynǵydai mamandyq boiynsha emes, bilim baǵdarlamalarynyń toptary boiynsha júzege asyrylmaq. Grant utyp alǵan soń talapker JOO-ǵa tańdaǵan bilim baǵdarlamasy boiynsha tirkelip, JOO-ǵa qujattaryn tapsyrý kezinde ózi tańdaǵan mamandyq boiynsha bilim alady», - delingen habarlamada.
BǴM baspasóz qyzmetiniń málimetinshe, 2019 jyly UBT formaty esh ózgerissiz qalady. Oqýǵa túsýshi dástúrli túrde 3 mindetti pán (Qazaqstan tarihy, matematikalyq saýattylyq, oqý saýattylyǵy) jáne 2 beiindik pán boiynsha testileýden ótedi.
«Biraq, biyldan bastap UBT jylyna 4 ret - qańtar, naýryz, maýsym, tamyz ailarynda ótkizilmek. Qańtar, naýryz, tamyzda ótetin testileýdi tapsyrý arqyly talapker JOO-nyń tek aqyly bólimine túsýge múmkindik alady. Al, memlekettik bilim grant konkýrsyna qatysý úshin mindetti túrde maýsym aiynda ótetin Ulttyq biryńǵai testileýge qatysýy tiis. JOO-nyń aqyly bólimine oqýǵa túsý úshin talapkerge jylyna 4 ret ótkiziletin UBT-nyń kez kelgenine qatysyp, shekti ball jinaý jetkilikti» dep málim etti ministrlikten.
Qańtar, naýryz ailarynda ótetin testileýdi talapker UBT ótkiziletin ózine yńǵaily kez kelgen pýnktide tapsyra alady. Tek testileýge qatysý úshin UBT ótkizý pýnktine kórsetilgen merzimde ótinish berý qajet.
