2019 jyly oralmandar men qonys aýdarýshylardy qabyldaýǵa qansha kvota bólinetini belgili boldy. QR Úkimetiniń tiisti Qaýlysy «Ádilet» aqparattyq-quqyqtyq júiesinde jariialandy, dep habarlaidy "Ult aqparat".
Qazaqstan Úkimetiniń 2018 jylǵy № 916 qaýlysy 29 jeltoqsanda qabyldanǵan. Ol jariialanǵan ýaqyttan 10 kúnnen keiin qoldanysqa engiziledi.
Oǵan sáikes, oralmandardy qabyldaýdyń 2019 jylǵa arnalǵan óńirlik kvotasy 2 103 adamdy, qonys aýdarýshylardy qabyldaýdyń óńirlik kvotasy 7 771 adamdy quraidy.
«QR Eńbek jáne halyqty áleýmettik qorǵaý ministrligi 2019 jylǵy 1 tamyzǵa jáne 2020 jylǵy 1 aqpanǵa qarai Qazaqstan Respýblikasynyń Úkimetine osy qaýlynyń oryndalýy týraly esep bersin. Osy qaýly alǵash resmi jariialanǵan kúnnen kúntizbelik on kún ótken soń qoldanysqa engiziledi», - delingen QR Premer-Ministri Baqytjan Saǵyntaev qol qoiǵan qujatta.
Aita keteiik, «Halyqtyń kóshi-qony týraly» Zańyna sáikes Qazaqstanda oralmandar men qonys aýdarýshylardy qabyldaýdyń óńirlik kvotasy jyl saiyn belgilenedi.
