QR Premer-Ministri Asqar Maminniń tóraǵalyǵymen ótken Úkimet otyrysynda «Biznestiń jol kartasy–2020» biznesti qoldaý men damytýdyń memlekettik baǵdarlamasyn iske asyrý barysy qaraldy, dep habarlaidy "Ult aqparat".
Elimizde shaǵyn jáne orta kásipkerlikti damytý týraly baiandai otyryp, QR ulttyq ekonomika ministri Rýslan Dálenov memlekettik baǵdarlamany iske asyrýǵa respýblikalyq biýdjetten 210 mlrd teńge qarajat bólingenin atap ótti. Atalǵan qarajatqa 13 myń ShOB sýbektileri qarjylandyryldy, 10 myń jumys orny quryldy, 3,3 trln teńgege ónim shyǵaryldy.
Bólingen qarajattyń kóp bóligi — 126 mlrd teńge nemese barlyq somanyń 60,2%-y nesieler boiynsha syiaqy mólsherlemesin sýbsidiialaýǵa baǵyttalǵan. Bólingen qarajattyń 53 mlrd teńgesi nemese 25,2%-y fabrikalar, zaýyttar men shaǵyn jáne orta biznestiń óndiristik obektilerine jetispeitin infraqurylym júrgizýge baǵyttaldy. Qarajattyń qalǵan bóligi kreditterdi kepildendirýge, granttar berýge, oqytýǵa jáne kásipkerlerge konsýltatsiialyq qyzmet kóratýge baǵyttaldy.
«Baǵdarlamany iske asyrý kezeńderinde bólingen qarajattyń tolyqtai igerilýi qamtamasyz etildi. Bul rette 2019 jyly qarjylandyrýǵa 2018 jylǵy kórsetkishpen salystyrǵanda (57%-ǵa artyq qarajat kózdelgen. 2019 jylǵy birinshi toqsannyń qorytyndysy boiynsha 715 jobaǵa qoldaý kórsetildi, olar boiynsha 11,5 mlrd teńge somasyna sýbsidiialar men kepildikter tólendi», — dedi R. Dálenov.
Sonymen qosa, jyl saiyn 20 myńǵa jýyq kásipker bilim alady jáne biliktiligin arttyrady, 154 myń kásipker konsýltatsiialyq jáne servistik qyzmet alady.
2019 jylǵy 1 qańtardaǵy jaǵdai boiynsha jumys istep turǵan shaǵyn jáne orta kásipkerlik sýbektileriniń sany 1,2 mln birlikke jetti. Ótken jyldyń uqsas kezeńimen salystyrǵanda bul kórsetkish 8,3%-ǵa ósti.
Ministr biyl Elbasynyń tapsyrmasymen «qarapaiym zattar ekonomikasyn» damytý boiynsha qoljetimdi nesieleý mindetin sheshý úshin 600 mlrd teńge bólingenin eske saldy. 65 ekonomkalyq qyzmet túrinen 365 taýarlyq pozitsiia aiqyndaldy. Basym jobalardy nesieleý tetigi sheńberinde qazirgi kezge 283 mlrd teńge kredit somasyna 282 ótinim daiyndalý satysynda.
Budan basqa, ShOB damytýdy odan ári yntalandyrý úshin kásipkerlik qyzmetti damytýǵa qolaily jaǵdailar týdyrýǵa baǵyttalǵan biznes-ortany damytý boiynsha zańnamalyq túzetýlerdiń 7-shi paketi qabyldandy. «BJK - 2020» baǵdarlamasyn 2025 jylǵa deiin uzartý aiasynda qarjylai qoldaý quraldaryn jetildirýge baǵyttalǵan túzetýler ázirlengen.
Óz kezeginde indýstriia jáne infraqurylymdyq damý ministri Roman Skliar «qarapaiym zattar ekonomikasyn» damytý aiasynda basym jobalardy jeńildikpen nesielendirý baǵdarlamasyn tiimdi iske asyrý úshin 2019 jyldyń 18 naýryzynan bastap «Atamaken» UKP bazasynda Baǵdarlamany iske asyrý barysyna monitoring jasaityn Jobalyq ofis qyzmet atqaryp jatqanyn aitty.
«Búginde Jobalyq ofistiń 7 otyrysy ótkizildi, otyrys aiasynda óńirlerdegi 300-den astam kásiporyn tyńdaldy. Jobalyq ofis jumysynda somasy 306 mlrd teńgeni quraityn 344 áleýetti joba bar, onyń ishindegi 6,1 mlrd teńge bolatyn 10 jobany ekinshi deńgeili bankter maquldady, somasy 16,6 mlrd tg bolatyn 52 joba ekinshi deńgeili bankterdiń qaraýynda», — dedi R. Skliar. Bankterde qaralyp jatqan áleýetti jobalardyń negizgileri jeńil, tamaq ónerkásibi jáne qyzmet kórsetý salalarynan.
Aýyl sharýashylyǵy ministri Saparhan Omarov jeńildikti nesielendirý baǵdarlamasy boiynsha AÓK damytýǵa bólingen 200 mlrd teńgeden 100 mlrd teńgesi aýyl sharýashylyǵy ónimderin qaita óńdeýdi damytýǵa jumsalatynyn aitty. Onda mólsherleme «BJK–2020» esebinen sýbsidiialanady. Taǵy 100 mlrd teńgesi aýyl sharýashylyǵy óndirisin damytýǵa baǵyttalady — mólsherleme Aýyl sharýashylyǵy ministrliginiń baǵdarlamasy boiynsha sýbsidiialanady, biýdjette atalǵan maqsattarǵa qajetti qarajat bar.
Syiaqy mólsherlemesin sýbsidiialaýǵa qatysty aitar bolsaq, osy jyldyń 1 aqpanynan bastap memlekettik qyzmet kórsetý tizilimine sáikes atalǵan sýbsidiia tek qana elektrondy túrde júzege asyrylýy tiis. Aqparattyq-esep ortalyǵy «Transtelekom»-men birlese otyryp, investitsiia salyp, Qoldau.kz platformasynda sýbsidiialaýdyń elektrondy aqparattyq júiesin ázirledi.
«Biznestiń jol kartasy - 2020» baǵdarlamasyn iske asyrý barysy týraly Batys Qazaqstan oblysynyń ákimi A. Kólginov, Pavlodar oblysynyń ákimi - B. Baqaýov baiandady.
«Atameken» Ulttyq kásipkerler palatasynyń tóraǵasy A. Myrzahmetov «Atameken» QR UKP 2014 jyldan beri «Biznestiń jol kartasy–2020» baǵdarlamasynyń tórtinshi baǵyty - kásipkerlerdi qarjylai emes qoldaý boiynsha operator ekenin atap ótti, ony kelesi baǵyttar boiynsha iske asyrýda: jumys istep turǵan biznesti servistik qoldaý, monoqalalarda, shaǵyn qalalar men aýdan ortalyqtarynda biznesti memlekettik qoldaý sharalary týraly aqparattyq qamtamasyz etý, «Biznes-mektep», «Iskerlik bailanystar», «Aǵa senorlar» jobalary. 20 kásipkerlerge qyzmet kórsetý ortalyǵy men 191 kásipkerlerdi qoldaý ortalyǵy jumys isteidi. 2018 j. bastap 138 myńnan astam kásipkerler biznes-mektep pen «Iskerlik bailanystar» quraly aiasynda tegin servistik qyzmetterdi paidalandy, 20 914 kásipker oqytyldy, tikelei kásiporyndarda keńes berý úshin tabysty jumys tájiribesi bar 64 biliktiligi joǵary sheteldik mamannyń eskperttik missiiasy iske asyryldy.
Máseleni qaraý qorytyndysy boiynsha QR Premer-Ministriniń birinshi orynbasary Á. Smaiylov «Biznestiń jol kartasy - 2020» biznesti qoldaý baǵdarlamasy el ekonomikasyn damytýda mańyzdy qural ekenin atap ótti. Baǵdarlamanyń arqasynda elimizde shaǵyn jáne orta biznesti qoldaý boiynsha aýqymdy jumystar atqaryldy. Biznesti qoldaý quraldaryn qaita qarastyrý nátijesinde 2025 jylǵa deiingi biznesti qoldaý memlekettik baǵdarlamasy ázirlenetin bolady, ol 1 qyrkúiekke deiin qabyldanýy tiis.
