2019 jyly AQSh pen Qytai kompaniialary álemdik áskeri naryqta basymdyqqa ie bolyp, ekeýi birge qarý-jaraq boiynsha saýda kórsetkishiniń 75 paiyzdan astam úlesine ie bolǵan. Stokgolm halyqaralyq beibitshilikti zertteý institýtynyń (SIPRI) esebinde osyndai málimet jazylǵan.
SIPRI esebinshe, álemde qarý-jaraq shyǵaratyn eń iri 25 kompaniianyń 12-si - AQSh-ta ornalasqan. Qarý-jaraq satý men áskeri qyzmet kórsetý kórsetkishiniń 61 paiyzy - osy 12 kompaniia úlesinde. Al tabystyń 15,7 paiyzy qytailyq kompaniialarǵa tiesili.
Zertteý institýtynyń málimetinshe, tórt qytailyq kompaniia byltyr alǵash ret álemdegi 25 iri kompaniia qataryna qosylǵan. Bul kompaniialar jaily derek bolmaǵandyqtan aldyńǵy jyldary esepke enbei qalǵan.
SIPRI aqparaty boiynsha, 2019 jyly atalǵan 25 kompaniia quny 361 milliard dollar bolatyn ónim shyǵaryp, áskeri qyzmet kórsetken. Bul aldyńǵy jylmen salystyrǵanda 8,5 paiyzǵa kóp.
25 iri kompaniia arasynda eki reseilik: "Almaz Antei" jáne "Birikken keme qurylysy" kompaniiasy bar. Áskeri ushaq qurastyrýmen ainalysatyn úshinshi reseilik kompaniia byltyr quny 1,3 milliard bolatyn ónim shyǵaryp, tizimnen shyǵyp qalǵan.
Tizimde alǵashqy bestikte amerikalyq Lockheed Martin áýe-ǵarysh kompaniiasy, Boeing, Northrop Grumman, Raytheon jáne General Dynamics kompaniialary tur. Halyqaralyq qarý-jaraq naryǵynda AQSh ondaǵan jyldar boiy alda keledi, biraq byltyr qytailyq kompaniialardyń úlesi 5 paiyzǵa artqan.
