Eńbek jáne halyqty áleýmettik qorǵaý ministri Tamara Dúisenova, oblystar jáne Astana, Almaty qalalary ákimderiniń orynbasarlarymen, halyqty áleýmettik qamsyzdandyrý jáne jumyspen qamtý máseleleri jóninde jiyn ótkizdi. Bul týraly ministrliktiń baspasóz qyzmeti habarlady.
Sonymen qatar, alqaly basqosýǵa, Eńbek, áleýmettik qorǵaý jáne kóshi-qon komiteti aýmaqtyq departamentteriniń direktorlary, jergilikti atqarý organdardaǵy jumyspen qamtýdy jáne áleýmettik baǵdarlamalardy úilestirý basqarmalarynyń basshylary, ózge de múddeli taraptar qatysty.
Kúntártibindegi basty taqyryp retinde ataýly áleýmettik kómektiń (ári qarai – AÁK) jańa sipatyn qoldanysqa engizý, bazalyq zeinetaqyny taǵaiyndaý ádistemesin ózgertý jáne ózin jumyspen qamtyǵan turǵyndar tobymen jumys jailary talqylandy.
Jańa sipattaǵy AÁK turǵysynda, Ministr, jumyspen qamtý ortalyqtaryn kúsheitý arqyly olardyń materialdyq-tehnikalyq jabdyqtalýy men mamandar daiarlaý isine asa mán berý kerek ekenin nusqady.
"Eger qazirgi tańda AÁK tabysy kúnkóris deńgeiinen 40 paiyz tómen adamdar men otbasylarǵa qarjylai kómek retinde beriletin bolsa, jańa jyldan bastap jan basyna shaqqandaǵy tabysy kúnkóris deńgeiinen 50 paiyz tómen otbasylarǵa beriletin bolady. Sonymen birge, jańa sipattaǵy AÁK - qazirgi tańdaǵy AÁK, balalar járdemaqysy jáne arnaiy memlekettik járdemaqy sekildi 3 áleýmettik tólemniń ornyna Biryńǵai járdemaqy túrinde tólenedi. Eń basty eskeretin jait, jańa AÁK mólsheri joǵaryda atalǵan 3 túrli járdemaqynyń jalpy somasynan joǵary bolady. Osylaisha, jańa AÁK tek qana qarjylai járdemaqy ǵana emes, kedeilik deńgeiinen shyǵýdyń keshendi sharasy bolmaq. Járdemaqynyń qoljetimdiligi men biznes-protsesterdi ońtailandyrý maqsatynda jumysty bir tereze júiesimen Jumyspen qamtý ortalyqtary arqyly júrgizý usynylady", - dedi Ministr.
Eńbek jáne halyqty áleýmettik qorǵaý ministri jinalǵandardyń nazaryn keler jyldan bastap bazalyq zeinetaqy taǵaiyndaý tetigi ózgeretine de aýdardy.
2018 jyldyń 1 qańtarynan bastap, Memleket basshysynyń tapsyrmasyna sai, yntymaqty zeinetaqy 8 paiyzǵa ósedi. Bazalyq zeinetaqy, basqa da járdemaqy túrleri siiaqty, 6 paiyzǵa kóbeiedi. Osy arqyly, bazalyq zeinetaqyny eskergendegi zeinetaqynyń tómengi mólsheri kelesi jyly 49 019 teńgeni qurap, ortasha dárejesi 71 333 teńgeni tóńirektemek.
"Qazirgi ýaqytta bazalyq zeinetaqy zeinet jasyna jetkenderge bárine birdei eńbek ótilin jáne zeinetaqy jinaǵyn qalyptastyrýǵa qatysýdy eskerýsiz taǵaiyndalady. Kelesi jyldan bazalyq zeinetaqy júiege qatysý ótiline qarai beriletini kózdelýde. Osy oraida 1998 jyldan keiingi jinaqtaýshy zeinetaqy júiesine zeinetaqy jarnalarynyń túsý aralyǵy ǵana eseptilinip qoimai, 1998 jylǵa deiingi de eńbek ótili nazarǵa alynatyny boljanýda", - dep túsindirdi Tamara Dýisenova.
Mundai ádis, 30-40 jyl eńbek ótili bolsa da, tómen zeinetaqy alyp otyrǵan adamdarǵa qatysty ádildik ornatatyny kútilýde. 1998 jylǵa deiin jáne odan keiin de 33 jyldan asatyn ótili bar tulǵalarǵa, bazalyq zeinetaqy aǵymdaǵy kólemimen salystyrǵanda eki esege kóbeiedi. Eger bul soma qazir 14 myń teńgeni kórsetse, 2018 jyldyń 1 shildesinen zeinetkerlerdiń atalǵan toby yntymaqty jáne jinaqtaýshy zeinetaqyǵa qosa, 28 myń teńgeni iemdenetin bolady.
10 jyldan asqan ár jyl saiyn bazalyq zeinetaqy 2 paiyzǵa óspek. Máselen, 20 jyldyq eńbek ótilinde bazalyq zeinetaqy eń tómengi kúnkóris deńgeiiniń 74 paiyzyn qurasa, 30 jylda 94 paiyzdy mejelemek. Zańda aiqyndalǵandai, 33 jyldy eńsergen ótil belesinde bazalyq zeinetaqy kúnkóris deńgeiiniń tolyq 100 paiyz kólemin qamtymaq.
Ózin jumyspen qamtyǵan turǵyndar qyzmetin retteýde 2018-2019 jyldarǵa arnalǵan Jol kartasy jasalýda.
Tamara Dúisenova, joǵaryda kórsetilgen barlyq mindetterdi qaperge alǵan raida, Úkimettiń áleýmettik salada júrgizip otyrǵan saiasatyn óńirlerde túsindirý is-qimyldaryn shiratý qajettigin atap ótti.
Esterińizge sala keteiik, 2018 jyldyń 1 qańtarynan bastap, Elbasynyń "Ult jospary - 100 naqty qadam" ideiasy men halyqqa Joldaýynan týyndaityn tapsyrmalardy júzege asyrý maqsatynda áleýmettik-eńbek salasyn jańǵyrtýǵa baǵyttalǵan keshendi sharalar júzege asady.
