Parlament Senatynyń 2018 jyldaǵy qorytyndy jalpy otyrysynda Palata tóraǵasy Qasym-Jomart Toqaev biylǵy jyldyń jetistikterin atady, dep habarlaidy QazAqparat.
«Palatanyń osy jylǵy qorytyndy otyrysyn ótkizdik. Elimiz úshin jetistikterge toly 2018 jyl tarihymyzda óziniń laiyqty ornyn alatyny sózsiz. Biz osy jyl ishinde Prezident Nursultan Ábishuly Nazarbaevtyń basshylyǵymen barsha halyqpen birge memleket ómirinde oryn alǵan qoǵamdyq-saiasi mańyzy zor oqiǵalardyń qatysýshysy boldyq. Halyqtyń ómir sapasyn jaqsartý jolyndaǵy Elbasynyń teńdessiz bastamalaryn iske asyrý jumysyna belsene qatystyq. Biyl elimiz ámbebap ári balamasy joq álemdik uiym - Birikken Ulttar Uiymy Qaýipsizdik Keńesiniń múshesi retinde jemisti jumysyn jalǵastyryp, Keńestegi tóraǵalyq qyzmetin abyroimen atqardy. Bul Elbasynyń álemdegi biik bedeliniń arqasy jáne aiqyn kórinisi», - dedi Senat tóraǵasy.
Sonymen qatar Q. Toqaev Táýelsizdigimizdiń boitumary, Elbasymyz negizin qalaǵan ásem qala, elordamyz - Astananyń mereili 20 jyldyǵy keń aýqymda atap ótilgenin eske saldy.
«Búginde memlekettik biliktiń barlyq tarmaqtary Prezidenttiń áleýmettik bastamalaryn belsendi túrde iske asyrýda.
Joldaýǵa sáikes, eń aldymen, qazaqstandyqtardyń kiris deńgeiin arttyrý sharalary qolǵa alyndy. 2019 jylǵy 1 qańtardan bastap eń tómen jalaqy 1,5 esege arttyrylady, zeinetaqy mólsheri kóbeitiledi, kommýnaldyq qyzmetterdiń tarifteri tómendetiledi.
Osy jyly Kaspiidiń quqyqtyq mártebesi boiynsha 5 memleket 20 jyldyq kelissózderdiń nátijesinde arnaiy konventsiiaǵa qol qoidy.
Kaspii teńiziniń quqyqtyq mártebesin anyqtaý jónindegi konventsiiany ratifikatsiialaýǵa qatysty zań jobasyn Palatamyz jańa jylda qaraidy», - dedi ol.
Senat jyl ishinde Elbasy usynǵan reformalardy zańnamalyq jaǵynan qamtamasyz etý boiynsha aýqymdy jumystardy atqardy.
Jalpy, biyl Parlament 80 zań qabyldady. Qabyldanǵan zańdardyń 30-ǵa jýyǵy Elbasynyń naqty tapsyrmalaryn oryndaýǵa baǵyttaldy.
«Senatorlar zań jobalarynyń basym kópshiligin qysqa merzimde jan-jaqty muqiiat qarastyryp, kóptegen mańyzdy túzetýler engizgenin atap ótý qajet. Senat depýtattary qoǵamymyzdaǵy eń ózekti máseleler boiynsha Úkimetke 100-den asa depýtattyq saýal joldady.
Biyl Palata zań shyǵarý jumysymen qatar, parlamenttik qyzmettiń basqa da baǵyttary boiynsha óte belsendi jumys istedi», - dedi Qasym-Jomart Toqaev.
