Shved akademiiasy 2018 jyly ádebiet salasy boiynsha Nobel syilyǵyn tapsyrmaidy. Akademiianyń bul sheshimi Nobel syilyǵy saitynda jariialandy. Syilyqty tapsyrý sońǵy ret 1943 jyly keiinge qaldyrylǵan edi.
Habarlamada bul sheshimniń basqa salalar boiynsha Nobel syilyǵyn tabystaýǵa áser etpeitini aitylady. Akademiia ádebiet salasynda 2018 jylǵy Nobel syilyǵy iegeriniń aty-jóni 2019 jylǵy jeńimpazben birge jariialanatynyn málimdedi.
Shved akademiiasy ádebiet salasy boiynsha Nobel syilyǵyn tabystaýdan frantsýz fotografy Jan-Klod Arnoǵa qatysty daýǵa bailanysty bas tartyp otyr. Jan-Klod Arno - akademiiaǵa 1992 jyly sailanǵan shved aqyny Katarina Frostensonnyń kúieýi. Arno Shved akademiiasy qarjylai qoldaý kórsetken mádeni jobany basqarǵan. Buǵan deiin 20 shaqty áiel ony jynystyq bopsa jasady dep aiyptaǵan.
Qazirgi tańda bul sala boiynsha jeńimpazdardy anyqtaityn Shved akademiiasy mamandary óz erikterimen qyzmetinen ketken. Sáýirdiń ortasynda akademiia hatshysy Sara Daniýs ta ornyn bosatqan bolatyn. Olarǵa "jeńimpaz iesin aldyn ala habarlap qoidy" degen aiyp taǵylǵan. Osyǵan deiin resmi habarlama shyqqansha ádebiet salasy boiynsha Nobel syilyǵyn Vislava Shimborskaia (1996), Elfrida Elinek (2004), Garold Pinter (2005), Jan-Mari Giýstav Leklezio (2008), Patrik Modiano (2014), Svetlana Aleksievich (2015) pen Bob Dilannyń (2016) alatyny aldyn ala álemge tarap ketken edi. Buǵan da kináliler qatarynda Jan-Klod Arno bar. Arnonyń ózi taǵylǵan aiypty teristeidi.
Fotograftyń janjalynan soń Katarina Frostenson akademiia quramynan shyǵaryldy.
