Búgin QR Premer-Ministri Baqytjan Saǵyntaevtyń tóraǵalyǵymen ótken Úkimet otyrysynda «Nurly jol» infraqurylymdy damytýdyń 2015–2019 jyldarǵa arnalǵan memlekettik baǵdarlamasyn iske asyrý barysy týraly ulttyq ekonomika ministri Timýr Súleimenov baiandady, dep habarlaidy "Ult aqparat" Úkimet basshysynyń saityna silteme jasap.
Timýr Súleimenovtyń aitýynsha, 2017 jyly «Nurly jol» baǵdarlamasyn iske asyrýǵa 484,2 mlrd teńge bólingen, 2017 jyldyń 1 qazanyndaǵy jaǵdai boiynsha onyń 313,7 mlrd teńgesi nemese qarjylandyrýdyń jyldyq josparynyń 65% igerilgen.
Respýblikalyq mańyzdaǵy 22 negizgi avtojol jobasyn iske asyrýǵa biyl 259,8 mlrd teńge qarastyrylǵan, onyń ishinde 1 qazandaǵy jaǵdai boiynsha 150,4 mlrd teńgesi bólingen, búginde bul tolyq kólemde igerilgen. Budan ózge, 96,4 mlrd teńge somasyndaǵy HQU zaimdary qosymsha tartylǵan, búginde onyń 27 mlrd teńgesi igerilgen.
Ministr kólemdi jobalarǵa da toqtalyp ótti. 2017 jyly «Ulttyq indýstriialyq munai-himiia tehnoparki» AEA infraqurylymynyń qurylysyna 7,7 mlrd teńge kóleminde qarjy qarastyrylǵan. Búginde gaz-týrbinaly elektr stantsiiasy jobasy boiynsha negizgi tehnologiialyq jabdyqpen qamtamasyz etý jumystary aiaqtalǵan, qurylys-montaj jumystary júrgizilip jatyr. Jobany iske asyrý kestege sáikes júrgizilýde.
2017 jyly jylýmen, sýmen jabdyqtaý jáne sý tartý jelileriniń júiesin jańǵyrtýǵa Ulttyq qor qarajattarynan 53 mlrd teńge qarastyrylǵan, bul 700 shaqyrymǵa jýyq jelini salyp, rekonstrýktsiialaýǵa múmkindik beredi.
Budan ózge, 2017 jyly bilim berý salasynyń infraqurylymyn damytýǵa Ulttyq qor qarajatynan 109 bilim berý nysanynyń qurylysyna 71,7 mlrd teńge qarastyrylǵan, biyl onyń 76 nysanyn paidalanýǵa berý kózdelip otyr.
«Kásipkerlik nysandaryna jetispeitin infraqurylymdy júrgizýge Ulttyq qor qarajatynan 10 mlrd teńge bólingen. Atalǵan baǵyt aiasynda ministrlik óńirlermen birlesip, Qarjylandyrý josparyn qaita qaraý jumystaryn júrgizdi, nátijesinde osy jyldyń jeltoqsan aiyna josparlanǵan barlyq qarajat qarasha aiyna aýystyryldy. Bul qarajattardyń igerilmei qalý qaýpin tómendetýge múmkindik beredi», — dedi T. Súleimenov.
Talqylaý barysynda qarjy ministri Baqyt Sultanov 2017 jyly «Nurly jol» infraqurylymdy damytý memlekettik baǵdarlamasyn iske asyrý shyǵyndaryn qarjylandyrý týraly baiandady.
