Foto: gov.kz
Josparly jattyǵýlar ótkizgen birneshe jyl ishinde armiiada 5 áskeri qyzmetshi qaza tapty. Senator Gennadii Shipovskih óziniń depýtattyq saýalynda sarbazdardyń qaýipsizdigin qamtamasyz etý máselelerin kóterdi, dep habarlaidy QazAqparat.
Depýtat áskeri qyzmetshiler beibit ýaqytta qaza tapqanyna toqtala kele, josparly oqý-jattyǵý kezinde múgedek bolý oqiaǵalary da kezdesetinin aitty.
Senatordyń pikirinshe, munyń sebepteriniń biri – jattyǵý kezinde qaýipsizdik erejelerin qamtamasyz etý deńgeiiniń tómendigi.
«2017 jyldan beri parashiýtpen josparly sekirý oqý-jattyǵýy kezinde Otan qorǵaýshymyzdyń beseýinen aiyrylyp otyrmyz. Budan ózge, 2019 jyly Mańǵystaý oblysynda áskerilerdiń oqý-jattyǵýy kezinde granata jarylyp, sarbaz qolynan aiyryldy. Osy sekildi, áskerde oqý-jattyǵý kezinde tehnikalyq qaýipsizdik erejelerin saqtamaý sebebinen granata jarylyp, qarý atylyp ketý nemese basqa da saldar boiynsha qanshama faktiler tirkeldi. Olardyń biri densaýlyqtan aiyrsa, biri janynan aiyryp jatyr. Bundai oqys oqiǵalar birneshe márte bolsa da, odan áli sabaq almadyq. Atalǵan oqiǵalar áskerdegi tehnikalyq qaýipsizdik sharalaryna tiisti deńgeide nazar aýdarylmaitynyn baiqatty», - dedi Gennadii Shipovskih Bas prokýratýraǵa joldaǵan saýalynda.
Eske salsaq, biyl 18 qańtar kúni Astana qalasynyń mańaiynda parashiýtpen josparly sekirý boiynsha oqý-jaýyngerlik tapsyrmalaryn oryndaý barysynda merzimdi qyzmettegi sarbaz qaza tapty.
