2006 jyldan beri «Atasý - Alashankoý» munai qubyrymen Qytaiǵa 100 mln tonnadan astam munai eksporttaldy, dep xabarlaidy QazAqparat tilshisi.
China National Petroleum Corporation (CNPC) direktordyń orynbasary Tsin Veichjýnnyń aitýynsha, atalǵan kompaniia Qazaqstanda jyl saiyn 20 mln tonna shiki munaidy óndirip otyrady. Al «QazTransGaz» ulttyq kompaniiasymen birlese otyryp, «Beineý-Bozoi-Shymkent» gaz qubyry salyndy. Ol arqyly gazdy tasymaldaý kólemi 230 mlrd tekshe metrge jetti. Budan bólek, «Atasý-Alashankoý» munai qubyry paidalanýǵa berildi. 2006 jyldan beri ol arqyly Qytaiǵa 110 mln tonna munai eksporttaldy.
«CNPC Shymkent munai óńdeý zaýytyn jańǵyrtý sharalaryna qatysyp keledi. Osy jumystyń ekinshi kezeńi sátti aiaqtaldy. Qazaqstanda biz 42 mlrd teńgeniń salyǵyn tóledik. Áleýmettik jaýapkershilik qaǵidattaryn da saqtap kelemiz. Osy ýaqytqa deiin 30 myń adamǵa jumys berdik. Biz osy saladaǵy yntymaqtastyq bailanystardy ary qarai nyǵaitýǵa daiynbyz», - dedi Tsin Veichjýn Astanada ótken qazaq-qytai biznes forýmynda.
Aita keteiik, búgin Astanadaǵy «Riksos» qonaq úiinde qazaq-qytai biznes forýmy ótti. Atalǵan shara «Bir beldeý - bir jol» bastamasynyń bes jyldyǵyna arnalyp otyr. Búginde QHR osy bastamanyń boiynda ornalasqan 25 memleketpen tyǵyz qarym-qatynas ornatyp, ózara saýda-sattyqty 605 mlrd dollarǵa jetkizdi. Sonyń ishinde Qazaqstan men Qytai arasyndaǵy saýda ainalymy 10 mlrd dollardy quraidy.
QR Prezidenti Nursultan Nazarbaev búgingi forým qatysýshylaryna óz quttyqtaýyn joldady. Qytai Halyq Respýblikasynyń Tóraǵasy Si Tszinpin da úndeý joldap, Qazaqstannyń Prezidenti Nursultan Nazarbaevqa óz rizashylyǵyn bildirdi. Al QHR Kommertsiia jónindegi vitse-ministri Jen Hýnbinniń aitýynsha, Qazaqstan men Qytai saýda-sattyqty dollarsyz júrgizýdi kózdeidi.
