Jastar arasynda álem chempiony atanǵan Sadriddin Ahmedov (3-0, 3 KO) kásipqoi bokstaǵy tórtinshi jeńisine qol jetkizdi.
Orta salmaqta judyryqtasatyn 20 jastaǵy otandasymyz kezekti jekpe-jegin Monrealda (Kanada) ótkizdi. Onyń qarsylasy meksikalyq Haver Hesýs Mendosa (7-5-1, 6 KO) boldy.
Alty raýndqa eseptelgen jekpe-jektiń 57-shi sekýndynda Ahmedov tehnikalyq nokaýtpen merziminen buryn jeńiske jetti. Osylaisha Sadriddin kásipqoi bokstaǵy tórt jekpe-jegin de nokaýtpen aiaqtap otyr, al Mendosa karerasynda altynshy márte jeńiliske ushyrady, dep habarlady Sputnik Sports.kz portalyna silteme jasap.
Aita keteiik, kanadalyq BAQ Ahmedovtyń bolashaǵy jarqyn ekenin jarysa jazyp jatyr. Mysaly, Boxrec.com jýrnalisi Filipp Sent-Marten: "Myna jigitti nazarda ustańyzdar! Onyń boiynda uly karera jasaýǵa qajettiniń bári bar!", — dep atap ótti.
Esterińizge sala keteiik, juma kúni jeńilip kórmegen taǵy bir qazaqstandyq boksshy Áli Ahmedov kásibi ringtegi 13-shi jeńisine qol jetkizgenin jazǵan edik.
23 jastaǵy WBC jastar belbeýiniń iegeri AQSh-tyń Kaliforniia shtatyndaǵy Kosta-Mese qalasynda belbeý úshin jekpe-jek ótkizdi. Qazaqstandyq sportshynyń qarsylasy 27 jastaǵy meksikalyq Djovani Haver Gomes boldy. Segiz raýndqa josparlanǵan jekpe-jek alǵashqy raýndta-aq aiaqtaldy. Buǵan Ahmedovtiń qarsylasynyń baýyrynan qatty soqqy jasaýy sebep boldy.
WBC belbeýler júiesine kiretin NABF (Soltústik Amerikanyń boks federatsiiasy) Junior chempiondyq titýly báske tigilgen-di.
