Múmkindigi shekteýli balalar turǵyn úi kezegine turý quqyǵyna qatysty jańa norma engiziledi. Bul týraly Parlament Májilisiniń jalpy otyrysynda tiisti zań jobasyn qaraý kezinde QR Eńbek jáne halyqty áleýmettik qorǵaý ministri Serik Shápkenov málim etti, dep habarlaidy QazAqparat.
Aita keteiik, depýtattar «Qazaqstan Respýblikasynyń keibir zańnamalyq aktilerine azamattardyń jekelegen sanattaryn áleýmettik qorǵaý máseleleri boiynsha ózgerister men tolyqtyrýlar engizý týraly» zań jobasy birinshi oqylymda talqylanyp jatyr.
«Qujatta múgedektigi bar balany tárbielep otyrǵan otbasylarǵa bala kámelettik jasqa tolǵannan keiin de turǵyn úi kezeginde turý quqyǵyn saqtaý kózdeledi. Is júzinde mundai otbasylar turǵyn úi kezeginde 10 jylǵa deiin turady. Eger bala 18 jasqa tolǵanǵa deiin turǵyn úi alý múmkin bolmasa, onda múgedektigi bar azamat kezekke qaita turýǵa májbúr. Bul norma 20 myńnan astam otbasyna turǵyn úi kezegin saqtaýǵa múmkindik beredi», - dedi Serik Shápkenov.
