Foto: dknews.kz
2 sáýir – Daniianyń uly ertegishisi G.H.Andersenniń týǵan kúni. Bul kúni 1956 jyldan bastap eki jylda bir ret úzdik balalar jazýshylaryna jáne sýretshileri – balalar kitaptarynyń illiýstratorlaryna halyqaralyq G.H.Andersen atyndaǵy syilyq beriledi, dep habarlaidy Ult.kz.
1967 jyldan bastap bul kún Balalar kitaby jónindegi halyqaralyq keńespen (International Children’s Book day) bekitilgen Halyqaralyq balalar kitaby kúni toilanady. Nemis jazýshysy Iella Lepma Halyqaralyq balalar kitaby kúnin ótkizýdiń bastamashysy boldy.
Májilis depýtaty Ashat Aimaǵambetov búgingi aitýly merekemen quttyqtai otyra, balalyq shaqtan bastap kitap oqýdyń mańyzy zor ekenin aitady. Kitap oqý balanyń oi-órisin keńeitip, syni oilaý qabiletin damytady, qundylyqtary men tárbiesine, oqý úlgerimine tikelei áser etedi, deidi ol.
"Halyqaralyq zertteýler, mysaly, PISA jáne TIMSS, oqý daǵdylary men bilim jetistikteriniń tyǵyz bailanysta ekenin naqty kórsetedi. Máselen, PISA zertteýi boiynsha, aptasyna keminde bir kitap oqityn oqýshylar oqylym saýattylyǵy boiynsha bir oqý jylyna teń artyqshylyqqa ie", - deidi Aimaǵambetov.
Depýtattyń aitýynsha, memleket basshysy balalardyń kitap oqýǵa baýlý baǵytynda Úkimetke birneshe naqty tapsyrma bergen. Osyǵan bailanysty depýtattar toby Salyq kodeksine birneshe naqty túzetýler usynǵan:
• Jazýshylar men baspagerlerge salyqtyq jeńildikter, sonyń ishinde QQS-ti edáýir tómendetý;
• Memleket tarapynan sapaly otandyq ádebietti shyǵarýǵa tikelei qoldaý kórsetý;
• Qazaq tilindegi zamanaýi ári mazmundy balalar ádebietiniń kóbeiýine jaǵdai jasaý.
Aimaǵambetov balaǵa kitapty súiýdi úiretý úshin aldymen ata-ana ózi kitapty súiýi kerek dep esepteidi.
"Kitap oqý mádenieti eń aldymen otbasynda qalyptasady. Bala ata-anasyn kitap oqyp otyrǵanyn kórse, eriksiz sol ádetke qyzyǵady. Bul – jai teoriia emes, meniń jeke ómirimde de talai márte dálelin tapqan dúnie", - dep qosty ol.
