7 jastan 16 jasqa deiingi balalardy múgedektik toptary boiynsha bólý qarastyrylyp otyr. Bul týraly búgin Májiliste zań jobasyn tanystyrý barysynda QR Eńbek jáne halyqty áleýmettik qorǵaý ministri Serik Shapkenov málim etti, dep habarlaidy QazAqparat.
Aita keteiik, búgin «Qazaqstan Respýblikasynyń keibir zańnamalyq aktilerine azamattardyń jekelegen sanattaryn áleýmettik qorǵaý máseleleri boiynsha ózgerister men tolyqtyrýlar engizý týraly» zań jobasy tanystyryldy.
«Ómir súrý men densaýlyqtyń qyzmet etýiniń, shektelýiniń halyqaralyq synyptamasyna sáikes 7 jastan 16 jasqa deiingi balalardy múgedektik toptary boiynsha bólý kózdeledi. Bul shara balalar syrqatynyń aýyrlyq dárejesine bailanysty járdemaqy mólsherin saralanǵan túrde belgileýge múmkindik beredi. Bul rette, járdemaqy mólsheri 16,7 paiyzdan 37%-paiyzǵa deiin ulǵaitylady. Jańashyldyq 31 myńnan astam múmkindigi shekteýli balaǵa qatysty bolady», - dedi ministr.
Onyń aitýynsha, bul norma Baiqońyrda turatyn múgedek balalarǵa beriletin arnaýly memlekettik járdemaqy mólsherine de oń áserin tigizedi. Osy oraida 207 bala qamtylady.
Budan bólek ministr múgedektigi boiynsha jáne asyraýshysynan aiyrylý jaǵdaiy boiynsha járdemaqylardy bir mezgilde alý quqyǵyn berý tetigine toqtaldy.
«Bul asyraýshysynan aiyrylǵan jáne quramynda múgedek balalary bar otbasylardyń tabys deńgeiin arttyrýǵa múmkindik beredi. Atalǵan norma engizilgen kezde 2 myńnan astam bala múgedektigi boiynsha járdemaqymen qosa asyraýshysynan aiyrylý boiynsha járdemaqy alatyn bolady. Qazirgi ýaqytta olar tańdaýy boiynsha járdemaqynyń bir túrin ǵana alyp otyr.
