QR Konstitýtsiialyq Keńesiniń múshesi Únzila Shapaq Keńestiń qyzmeti jaiynda esep berdi, dep habarlaidy QazAqparat.
«Konstitýtsiia – memlekettiń eń joǵary zań kúshi bar Negizgi Zańy. Biylǵy 30 tamyzynda respýblikalyq referendýmda Qazaqstan Respýblikasy Konstitýtsiiasynyń qabyldanǵanyna 25 jyl tolady. Negizgi Zańnyń mereitoiy qazaqstandyq memlekettilikti damytýdaǵy aitýly oqiǵa bolyp otyr», - dep atap ótti Ú. Shapaq Ortalyq kommýnikatsiialar qyzmetinde.
Osy oraida ol Konstitýtsiialyq Keńestiń qyzmeti eldiń Negizgi Zańynyń myzǵymastyǵyn qamtamasyz etýge baǵyttalǵanyn atap ótti.
«1996 jylǵy aqpannan bastap qazirgi ýaqytqa deiingi kezeń ishinde Konstitýtsiialyq Keńeske 200-den astam ótinish kelip tústi. 29 ótinishtiń máni Parlament qabyldaǵan jáne Memleket basshysyna qol qoiýǵa usynylǵan zańdardyń Konstitýtsiiaǵa sáikestigin tekserý bolǵan. Al 15 ótinish boiynsha jalpy alǵanda 17 zań Konstitýtsiiaǵa sáikes emes dep tanyldy. Konstitýtsiialyq Keńes Konstitýtsiianyń normalaryn resmi túsindirý týraly 100-den astam ótinishti qarady, olar boiynsha 80-nen astam normativtik qaýly qabyldandy. Osy qaýlylarda azamattardyń konstitýtsiialyq quqyqtaryn iske asyrý jáne qorǵaý, QR azamattyǵy, sailaý júiesi, memlekettik organdardyń mártebesi men ókilettikteri, jáne basqa da máseleler qaraldy», - dedi Ú. Shapaq.
Parlament Palatalarynyń birlesken otyrystarynda Konstitýtsiialyq Keńestiń Respýblikadaǵy konstitýtsiialyq zańdylyqtyń jai-kúii týraly 24 joldaýy jariia etildi. Olarda Konstitýtsiialyq Keńes eldegi zańdylyqtyń jai-kúiine taldaý jasaidy jáne adam quqyqtary men bostandyqtarynyń kepildikterin nyǵaitý jóninde naqty usynystar beredi.
Únzila Shapaqtyń aitýynsha, Konstitýtsiialyq Keńes konstitýtsiialyq qundylyqtardy túsindirý men nasihattaý jáne qoǵamnyń konstitýtsiialyq mádenietin arttyrý jóninde júieli sharalar qabyldaýda.
