IýNESKO-ǵa kiretin barlyq 193 el jasandy intellekttiń qaýipsiz damýy men qoldanylýyn qamtamasyz etý úshin qajetti jalpy qundylyqtar men qaǵidattardy anyqtaityn tarihi qujatty maquldady, dep habarlaidy QazAqparat BUU Jańalyqtar qyzmetine silteme jasap.
Naryqta múmkindigi shekteýli adamdardyń ómirin edáýir jeńildetetin jáne olardyń avtonomiiasyn keńeitetin kóptegen qurylǵylar bar.
Jasandy intellektke negizdelgen tehnologiialar bizdiń kúndelikti ómirimizde keńinen qoldanylady: reisterdi brondaý, bank nesiesin alýǵa ótinimderdi resimdeý kezinde, borttyq kompiýtermen basqarylatyn avtomobilderde. Jasandy intellekt qaterli isik aýrýyn diagnostikalaý jáne múgedekter úshin inkliýzivti orta qurý siiaqty mamandandyrylǵan salalarda keńinen qoldanylady.
Sonymen qatar, IýNESKO málimetteri boiynsha, úkimetter sheshim qabyldaýda, ashtyq pen klimattyń ózgerýi siiaqty problemalarmen kúresýde jasandy intellektti qoldanýda. Sonymen birge, IýNESKO bul tehnologiia «buryn-sońdy bolmaǵan problemalardy» týdyrýy múmkin dep eskertedi.
«Biz genderlik jáne etnikalyq turǵydan teris uǵym kórinisterin, sondai-aq jeke ómir men bostandyqtyń buzylýyn, jappai baqylaý qaýpin jáne quqyq qorǵaý organdarynyń jasandy intellekt tehnologiiasyn teris paidalanýyn baiqap jatyrmyz. Osy ýaqytqa deiin teris paidalanýdy shekteitin ádister, biregei standarttar bolmaǵan», - delingen IýNESKO málimdemesinde.
IýNESKO-ǵa múshe elder qabyldaǵan qujat jasandy intellekt tehnologiiasynyń etikalyq damýyn qamtamasyz etý úshin quqyqtyq infraqurylym qalyptastyrýǵa baǵyttalǵan.
«Álemge belgili bir jasandy intellektti qoldaný erejeleri qajet. Biz qabyldaǵan qujat álemde alǵashqy jahandyq normativtik baza ornatyp, memleketke ony qoldanǵany úshin jaýapkershilik júkteidi», - dedi IýNESKO bas direktory Odri Azýle.
