Petropavlda joǵary paiyzben zańsyz qaryz berip kelgen boks federatsiiasynyń burynǵy vitse-prezidenti Marat Ábilǵaziev sottaldy. Sot onyń 2013-2025 jyldary osyndai qyzmetten 1,879 mlrd teńge zańsyz tabys tapqanyn anyqtady, dep habarlaidy ult.kz.
«Vremia» basylymynyń jazýynsha, tergeý málimetinshe, Ábilǵazievten 43 adam qaryz alǵan. Olar páterlerin, úilerin, kólikterin jáne kommertsiialyq nysandaryn kepilge qoiǵan. Qaryz boiynsha ai saiynǵy paiyz kei jaǵdaida 10 paiyzǵa deiin jetken.
Sot materialdarynda keibir qaryz alýshylardyń bereshekti ótegenine qaramastan, qaryzy azaimaǵany kórsetilgen. Bir jaǵdaida 11 mln teńge alǵan kásipker úsh jylda 24 mln teńge tólese de, odan taǵy aqsha talap etilgen.
Taǵy bir epizodta áiel 13 myń dollar qaryz alyp, páterin kepilge qoiǵan. Alaida qujatta baspana Ábilǵazievke satylǵan bolyp rásimdelip, keiin ol páterdi óz atyna tirkep, basqa adamǵa satyp jibergen.
Sot úkimimen Ábilǵazievtiń 99 mln teńgeden astam bank qarajaty, 126 mln teńgeden astam qolma-qol aqshasy, shamamen 397 myń dollary, kólikteri, jeri men jyljymaityn múlki tárkilendi.
Ol kinásin moiyndaǵan joq. Sot ony zańsyz mikroqarjylandyrý qyzmeti, óz betinshe áreket etý jáne alaiaqtyqqa áreket jasaǵany úshin kináli dep tanyp, bastapqyda 3,5 jylǵa bas bostandyǵynan aiyrdy. Keiin raqymshylyqqa bailanysty jaza merzimi 2 jyl 7 ai 15 kúnge qysqartyldy.
