Almatyda QI Trade Kazakhstan kompaniiasyna 100 milliondap quiyp, san soǵyp qalǵandar politsiia departamentiniń aldyna jinaldy. Qarjy piramidasynyń basshylary úsh myń adamnyń 15 milliardtan astam aqshasyn qaltasyna basyp, shetelge qashyp ketken, - dep habarlaidy KTK telearnasy.
Eki jyldan beri aqshasyn óndire almai júrgender tergeýdiń siyrquiymshaqtanyp ketkenine renjýli.
Ońai olja tabamyn dep opyq jegen salymshylar Almatynyń politsiia departamentiniń aldyna keldi. Árqaisysy QI Trade Kazakhstan-ǵa qomaqty qarajat quiyp, ai saiyn dividend alyp otyrmaqshy bolǵan. Túsetin paida da kompaniiaǵa salǵan aqshaǵa bailanysty dep sendirgen eken. Iaǵni, "qanshalyqty kóp quisyń, syiaqysy da sonshalyqty kóp bolady". Osylaisha ańǵal halyq osy ýaqytqa deiin tapqan-taianǵanyn kúmándi uiymǵa salypty.
"Men 188 million teńgemnen, baspanamnan, kottedjimnen, páterimnen, jerimnen, bárinen aiyryldym. Osylarǵa sengenimnen bankte jatqan aqshamdy alyp, barlyq úiimdi satyp aqshasyn osynda saldym. Men bul kompaniiaǵa sendim, olar meni aldady.
...Bir tanysym aparǵan. Onyń aldynda №34 avtobýsta, metroda jarnama júrdi. Ony da kórdim. Keiin tanysym sol kompaniiaǵa aqsha salyp jatqanyma eki jyl boldy dedi. Soǵan senip bardym. Direktorǵa kirsem: «Apai, bankte aqsha ustamańyz, ol – haram» dedi. Kabinetinde úlken Quran kitap tur. «Men anamdy eki ret qajylyqqa aparyp keldim, namaz oqimyn, Qudaidan qorqamyn» dedi" - deidi Almaty turǵyny Fatima Nizamova.
Endi zardap shekken salymshylar kúdikti uiym basshylarynyń tezirek ustalyp, zań júzinde jazaǵa tartylýyn talap etip otyr. Ári kompaniiaǵa quiǵan qarajat tolyq qaitarylsa eken deidi.
"Eń birinshi bastaǵan kezde kompaniiada Ábdijapparov degen boldy. Sol Ábdijapparovty izdeýmen ainalyspai jatyr. Ol kisi Reseide, Máskeýde, anda-mynda deidi. Eki jyldan beri ustaityn ýaqyty boldy. Odan keiin Saǵymbaev Nurlan degen jigit, búkil konferentsiianyń bárin júrgizgen. Izdestirý sharasy durys júrmei jatyr. Ábdijapparov pen Saǵymbaev eki jyldan beri nege ustalmaidy? Basshylaryn ustamaǵandyqtan, qol astyndaǵy menedjerlerdi ǵana ustap, solarmen ǵana sot bolyp jatyr. Ol sottyń ózine qanaǵattanbaimyz" - deidi Almaty oblysynyń turǵyny Janagúl Orazahynova.
Al politseiler jeti kúdiktini jer-kókten izdep jatqanyn jetkizdi. Qarjy piramidasyna qatysy barlardyń árqaisysy ártúrli memlekette boi tasalap júr eken.
"Almaty qalasy politsiia departamentiniń óndirisinde tek izdestirý isi bar. Izdestirý isine sáikes 7 seziktini ustaýǵa jáne olardy quryqtaýǵa baǵyttalǵan is-sharalar júzege asyrylyp jatyr.
Politsiia departamentiniń operativti qyzmetkerlerimen barlyq arnaiy izdestirý sharasy júrgizilip jatyr. Seziktiler mindetti túrde ustalyp, jaýapqa tartylady" - dep túsindirdi Almaty qalalyq Politsiia departamentiniń resmi ókili Saltanat Ázirbek.
