20 qazannan bastap Qyrǵyzstan men Qazaqstannyń kámelet jasyna tolmaǵan azamattary shekaradan tek qana tólqujatpen óte alady. Bul jóninde Qyrǵyzstannyń memlekettik shekara qyzmetine silteme jasap Kabar agenttigi habarlady.
«2012 jyly 11 mamyrda qabyldanǵan Qyrǵyzstan men Qazaqstan úkimetteriniń arasyndaǵy «Qyrǵyzstan azamattarynyń Qazaqstan aýmaǵynda jáne Qazaqstan azamattarynyń Qyrǵyzstan aýmaǵynda júrip-turýy týraly» kelisimge 2020 jylǵy 18 tamyzda engizilgen ózgerister hattamasynyń kúshine enýine bailanysty 20 qazannan bastap eki eldiń memlekettik shekarasynda kámelet jasyna tolmaǵan balalar tek qana tólqujatpen ótkiziledi» delingen habarlamada.
Osylaisha Qyrǵyzstan jáne Qazaqstannyń kámelet jasyna tolmaǵan azamattarynyń týý týraly kýáligi memlekettik shekaradan ótýge jaramsyz qujat sanalady. Bul tyiym eki el arasyndaǵy áýe qatynasyna da qatysty.
Degenmen, osy ýaqytqa deiin shekaradan ótip úlgergen tólqujaty joq 16 jasqa tolmaǵan balalar otanyna oralatyn kezde shekaradan týý týraly kýáligin kórsetip óte alady.
