Beineden alynǵan kadr
Grýziiada 18 jastaǵy Qazaqstan azamaty esirtki qylmysyna bailanysty ustalyp, ómir boiyna bas bostandyǵynan aiyrylý jazasyna deiin tartylýy múmkin. Bul týraly Grýziia Ishki ister ministrligi habarlady.
Vedomstvo málimetinshe, 2008 jyly týǵan eki sheteldik azamat — Qazaqstan men Ýkraina azamattary el aýmaǵynda ártúrli ýaqytta qolǵa túsken. Olarǵa esirtki zattaryn iri jáne asa iri mólsherde zańsyz satyp alý, saqtaý jáne taratýǵa járdemdesý boiynsha aiyp taǵylǵan.
Tintý jáne tergeý áreketteri barysynda politsiia olardyń ýaqytsha turǵan jerlerinen asa iri mólsherdegi «metadon» esirtki zaty men ony ólshep-oraýǵa paidalanylǵan quraldardy tárkilegen.
Is Grýziia Qylmystyq kodeksiniń 260-baby boiynsha tergelip jatyr. Bul bap 20 jylǵa deiin nemese ómir boiyna bas bostandyǵynan aiyrý jazasyn qarastyrady.
Qazir atalǵan derekke qatysty Qazaqstannyń Syrtqy ister ministrligine resmi saýal joldanǵan.
Aita keteiik, buǵan deiin BAÁ-de taǵy bir qazaqstandyq azamatqa qatysty ómir boiyna bas bostandyǵynan aiyrý úkimi shyqqany habarlanǵan bolatyn. Ol is boiynsha da apelliatsiia berilip, sheshim áli zańdy kúshine engen joq.
