1,8 million qazaqstandyq 2021 jylǵy múlik salyǵyn áli tólemegen, - dep habarlaidy Tengrinews.kz tilshisi QR QM Memlekettik kirister komitetine silteme jasap.
Vedomstvo málimetinshe, 2022 jyldyń 1 qazanynda jyljymaityn múlik jáne jer ýchaskeleriniń menshik ieleriniń 2021 jylǵa eseptelgen múlik salyǵyn tóleý merzimi aiaqtalady.
Salyq zańnamasyna sáikes aldaǵy salyq somalary boiynsha habarlamalar aǵymdaǵy jyldyń shilde aiynda menshik ielerine jiberilgen bolatyn. Budan basqa "Kaspii bank" AQ mobildi qosymshasyn paidalanýshylaryna PUSH-habarlamalar túrinde jiberildi.
Sonymen birge, búgingi kúni shamamen 1,8 million menshik iesi (nemese 37,5 paiyz) 2021 jyl kezeńine 7,1 milliard teńge somasyna múlik salyǵyn tólemegen.
Osyǵan bailanysty, Memlekettik kirister komiteti 2022 jyldyń 2 qazanynan bastap jeke tulǵalardyń salyq bereshegi týraly habarlamalardy boryshkerlerge jiberetinin eske salady.
1 ailyq eseptik kórsetkishten astam bereshek somalary boiynsha habarlama tabys etilgen soń otyz jumys kúninen keiin bereshekti májbúrlep óndirip alý týraly salyq buiryǵy jiberiledi. Bul salyq buiryǵy 5 jumys kúni ótkennen keiin jeke sot oryndaýshylaryna májbúrlep óndirip alý úshin beriledi.
Bul rette, jeke sot oryndaýshylary bereshek somasynan basqa shottarǵa tyiym salý jáne shyǵýǵa shekteý qoiýdan týyndaǵan qolaisyzdyqtar týraly aitpaǵanda, salyq bereshegi somasynyń 25 paiyzyna deiingi mólsherde qosymsha tólemdi óndirip alady.
Salyqty "e-Salyq Azamat" jáne ekinshi deńgeidegi bankterdiń mobildi qosymshalary, "Elektrondyq úkimet" portaly arqyly, ekinshi deńgeidegi bankterdiń bólimsherindegi nemese tólem terminaldaryndaǵy qolma-qol aqsha qarajatymen, sondai-aq bankomattar men tólem terminaldaryndaǵy bank kartalary arqyly tóleýge bolady.
