Ulytaýdyń 72 jastaǵy turǵyny Sársenbai Qotyrashov búkil Qazaqstandy jaiaý aralap shyǵý nietimen saparǵa shyqqan. Búgin ol 1 700 shaqyrymdy artqa tastap, Almatyǵa jetti. Bul - onyń josparly baǵytyndaǵy 17 qalanyń besinshisi, dep habarlaidy QazAqparat.
Saiahatshy Almatyda stýdenttermen kezdesti. Ol joldaǵy eń kúrdeli aýmaq – Jezqazǵan-Qyzylorda arasy men Tarazǵa deiingi taý asýlary bolǵanyn aitty. Sondai-aq, aýa raiy da kedergi keltiretinin jetkizdi. Degenmen, eshbir kedergige qaramastan, saparyn jalǵastyryp keledi.
Aqsaqal «Ulytaýda boldyń ba?» atty marafonǵa jeti jyl daiyndalypty. Qarasha aiynyń basyna deiin Qazaqstannyń 17 qalasyn aralap ótpek. Ol úshin jalpy alǵanda 8 000 shaqyrym júrýi kerek.
«Jolda kezdesken adamdar jii toqtap, meni biraz jolǵa deiin jetkizip tastaýdy usyndy. Biraq, men ózime búkil qashyqtyqty jaiaý ótip shyǵamyn dep sert bergenmin. Men osy sertimdi saqtaýym kerek», - dedi Sársenbai Qotyrashov.
Ol barlyq jerde adamdardyń qýanyshpen qarsy alyp, qoldaý bildirip jatqanyna riza. Bul oǵan jiger syilaitynyn aitty. Qarjylai da, azyq-túlikpen de kómek kórsetkender bolǵan.
Marafonshy Almatydan Qonaev, Taldyqorǵan, Aiagóz qalalaryna jol tartady, odan ári Aqtaýǵa jetýdi josparlap otyr.
«Men shetelde eshqashan bolǵan emespin. Osy sapardan soń, kelesi jyly Mekke men Medinaǵa jaiaý barýdy armandaimyn», - deidi ol.
Aitýynsha, týystary bastapqyda onyń bul saparyna qarsy bolǵan. Keiin qoldaý bildiripti. Ol mundai marafonǵa qatysqysy keletinderde aiqyn maqsat pen myqty densaýlyq bolýy kerektigin atap ótti.
Aqsaqaldyń qoldaýshy toby da bar. Onymen birge Ulytaýdan Qyzylordaǵa deiin, Shymkentten Almatyǵa deiin top jetekshisi, ólketanýshy Bahtiiar Qojahmetov erip júrdi.
«Meniń kómegim qandai boldy? Men oǵan tańǵy as jasaýǵa kómektesem. 20 shaqyrymdy kólikpen júrip ótem, bul aralyqty ol shamamen túske deiin júrip ótý kerek. Sol jerde men shaihana, kafe, as ishetin jerdi izdeimin. Eger olar tabylmasa, ózim oǵan túski asty daiyndaimyn. Aryqarai osy shema boiynsha taǵy 20 shaqyrym júrem de, túnep shyǵatyn oryndy izdeimin», - dedi Bahtiiar Qojahmetov.
Aita keteiik, Ulytaý ulttyq tarihi-mádeni jáne tabiǵi murajai-qoryǵynyń qyzmetkeri, eńbek ardageri Sársenbai Qotyrashov 31 naýryzda jolǵa shyqqan. Maqsaty – el turǵyndaryn Ulytaý aýdanynyń tarihy jáne kieli jerlerimen tanystyrý, sondai-aq qolónershilermen kezdesý. Týǵan jeriniń atyn asqaqtatýdy óz mindeti sanaidy. Ol sondai-aq, qymyz meiramyn tanymal etkisi keledi.
«Sársenbai ata saiahatynyń sońynda Prezidentke «qymyz kúnin» jariialaý, ony Naýryz, Ait meiramymen qatar, jyl saiyn toilaý týraly hat jazǵysy keledi», - dedi Bahtiiar Qojahmetov.
