Foto: Pexels.com
Ministrlik Ǵylym jáne joǵary bilim ministrligine úsh jyldyq ǵylymi grantqa ótinim jiberdi. Bul jańa ýaqyt beldeýiniń qazaqstandyqtarǵa áserin zertteýge baǵyttalǵan, dep habarlaidy Ult.kz.
Bul týraly Májilis dálizinde Ǵylym jáne joǵary bilim ministri Saiasat Nurbek málimdedi.
«Ótinim úsh jyldyq 160 million teńgelik biýdjetke jasalǵan, biraq naqty somasy odan az bolýy múmkin. Meniń oiymsha, shamamen jartysyna, iaǵni 90–100 million teńge kóleminde toqtaimyz. Keshe joǵary ǵylymi-tehnikalyq komissiianyń otyrysy ótti. Biz konkýrs jariialaimyz, ári qarai naqty shyǵyndardy ulttyq ǵylymi keńes anyqtaidy», — dedi ministr.
Saiasat Nurbektiń aitýynsha, zertteýdi birneshe ǵylymi institýt qatysýymen júrgizedi:
«Algoritmdi egjei-tegjeili bilmeimin, sebebi ótinim endi ǵana kelip tústi. Konkýrs ótken kezde kóremiz. Bul zertteýge birneshe institýt qatysady — fiziologiia institýty, geografiia institýty. Zertteý saýalnama arqyly emes, naqty ǵylymi ádistermen júrgiziledi dep oilaimyn».
Degenmen, jýrnalister mundai shyǵyndardyń oryndy ekenine kúmán keltirdi. Ministr bul bastama qoǵam tarapynan túsken suranys ekenin aitty:
«Qoǵamdyq suranys bar, sondyqtan biz áreket etýge májbúrmiz. Densaýlyq saqtaý ministrligi bul bastamany tolyqtai qoldady. Biz grant berýshi uiym retinde qoldaý kórsettik», — dedi ol.
