Elimizde ata-analardyń biri qarsy bolǵan jaǵdaida 16 jasqa deiingi balalar men jasóspirimderge dini joralarǵa qatysýǵa tyiym salý usynylýda. Bul týraly Májilis úiinde QR Din isteri jáne azamattyq qoǵam ministri Nurlan Ermekbaev aitty, dep habarlaidy Baq.kz tilshisi.
Búgin Májilis úiinde «Qazaqstan Respýblikasynyń keibir zańnamalyq aktilerine dini qyzmet jáne dini birlestikter máseleleri boiynsha ózgerister men tolyqtyrýlar engizý týraly» Zań jobasy tanystyrylyp jatyr.
«Osy zań jobasynyń keibir normalaryna sáikes, 16 jasqa tolmaǵan balalar dini ǵibadathanaǵa, ol meshit bolsyn, shirkeý bolsyn nemese basqa dini joralar men jiyndarǵa tek ózderiniń kámelet jasqa tolǵan týystarymen, zańdy tulǵalar nemese ata-analarymen birge bara alady», - dedi Ermekbaev.
Ministrdiń aitýynsha, ata-ananyń biri qarsy bolǵan jaǵdaida bala bundai jiynǵa qatysa almaidy. Sondai-aq, Ermekbaev mektepte hidjab nemese oramal taǵyp júrý Bilim jáne ǵylym ministrliginiń quzyretindegi másele ekenin atap ótti.
«Óitkeni ministrdiń buiryǵyna sáikes, mektepte balalar arasynda kez kelgen alaýyzdyqty týdyratyn másele - qymbat buiymdar, qysqa kóilekter, onyń ishinde dini belgiler de bar. Sondyqtan, bul másele «Bilim berý týraly» zańy men Bilim jáne ǵylym ministriniń buiryǵynda óte anyq jazylǵan. Al qazirgi zań jobasynda bundai norma joq. Biraq, eger BǴM osyndai norma engizýge bastama bildirse, biz qarsy bolmaimyz», - dedi Nurlan Ermekbaev.
