Ekonomikalyq tergep-tekserý departamentiniń málimetinshe, Qairat P. men onyń anasy G. Alashbaeva asa iri kólemde alaiaqtyq jasady jáne qylmystyq jolmen alynǵan kiristi zańdastyrdy degen kúdikke ilindi, dep habarlaidy Ult.kz.
2021–2024 jyldar aralyǵynda P. Qairat «Biz Birgemiz Qazaqstan 2030» qory arqyly halyqtan qaiyrymdylyq kómek retinde qarjy jinap kelgen. Ol bul qarajatty muqtaj balalarǵa, Palestina halqyna jáne sý tasqynynan zardap shekkenderge baǵyttaimyn dep sendirgen.
Alaida tergeý nátijesi boiynsha, jinalǵan 3,5 mlrd teńge kólemindegi qarajat jeke qajettilikterge jumsalǵany anyqtaldy. P. Qairat qor esepshotyndaǵy aqshany óz atyna jáne anasy Alashbaevanyń atyna aýdaryp, olardy zergerlik buiymdar, kiim-keshek, jihaz, saiahattar, avtokólik jaldaý, jóndeý jumystary syndy maqsattarǵa jumsaǵan.
2024 jylǵy 1 sáýir men 15 qarasha aralyǵynda sý tasqynynan zardap shekkenderge arnalǵan 2,8 mlrd teńge jymqyrylǵan. Bul qarajattyń bir bóligi jalǵan kelisimsharttar jasaý arqyly qolma-qol aqshaǵa ainaldyrylǵan. Qairat P. 16 jeke kásipkermen metaldan jasalǵan kiiz úiler, qaiyqtar men etikter jetkizý týraly kelisimshartqa otyrǵan, biraq is júzinde bul kelisimder oryndalmaǵan.
Tergeý derekterine sai:
-
4 avtokólik, 4 páter, 2 avtoturaq orny, jeke úi, jer telimi men ǵimarat satyp alynǵan;
-
6,9 mln teńgege «Rolex» saǵaty alynǵan;
-
23 mln teńgege «Rebel Flowers» gúl salony satyp alynǵan (qujatta 2 mln teńge dep kórsetilgen);
-
Bul biznesten 69 mln teńge tabys túsken;
-
158 mln teńge turatyn zergerlik buiymdar, aiaq kiim men sómkeler tárkilendi;
-
865 mln teńgeniń múlkine tyiym salyndy.
Sonymen qatar, 72 mln teńge zardap shekkenderge turmystyq tehnika alý syltaýymen Alashbaevanyń esepshotyna aýdarylyp, keiin qolma-qol aqshaǵa ainaldyrylǵan.
Qazirgi ýaqytta G. Alashbaevaǵa qatysty úiqamaq túrindegi bultartpaý sharasy qoldanyldy. Tergeý amaldary jalǵasýda.
Aita keteiik, keshe Qarjylyq monitoring agenttigi Perizat Qairatqa qatysty qylmystyq istiń tergeýi aiaqtalǵanyn habarlady.
