Qarjylyq monitoring agenttigi (QMA) CVK ataýymen jumys istegen qarjy piramidasynyń qyzmetin toqtatty. Qazir agenttiktiń aýmaqtyq departamentteri elimizdiń 14 óńirinde tergeý jumystaryn júrgizip jatyr, dep habarlaidy ult.kz.
Tergeý málimetinshe, joba ózin marketpleis retinde tanystyryp, azamattarǵa kepildendirilgen tabys ákeletin túrli investitsiialyq paketterdi satyp alýdy usynǵan. Senim qalyptastyrý úshin qatysýshylardyń jeke kabinetterinde shyn máninde bolmaǵan taýarlarǵa qatysty oryndalǵan tapsyrystar men jóneltilimder kórsetilip, olarǵa virtýaldy syiaqy eseptelip otyrǵan.
Shemanyń negizgi tetigi jańa salymshylardy tartýǵa negizdelgen. Uiymdastyrýshylar árbir shaqyrylǵan qatysýshy úshin aqshalai bonýs pen baǵaly syilyqtar ýáde etken. Agressivti jarnama men óńirlerdegi belsendi nasihattyń nátijesinde zańsyz jobaǵa shamamen 1,5 myń adam tartylǵan.
QMA málimetinshe, jobany nasihattaý úshin jabyq kezdesýler, keńselerdiń saltanatty ashylýy jáne jappai tanystyrylymdar uiymdastyrylǵan. Bul is-sharalar áleýmettik jelilerde keńinen taratylyp, azamattardyń senimine kirý quraly retinde paidalanylǵan.
Salymshylardyń qarajaty kriptovaliýtalyq platformalar arqyly shyǵarylyp, keiin banktik shottarǵa aýdarylyp otyrǵan. Tergeý barysynda jalpy somasy 474 myń dollar bolatyn kriptoaktivterge tyiym salyndy.
Qazirgi ýaqytta tergeý jalǵasýda. QMA atalǵan qarjy piramidasynan zardap shekken azamattardy turǵylyqty jeri boiynsha agenttiktiń aýmaqtyq departamentterine júginýge shaqyrdy.
