QR Eńbek jáne halyqty áleýmettik qorǵaý ministrliginiń, «Eńbek resýrstaryn damytý ortalyǵy» AQ men Coursera onlain oqytý platformasynyń birlesken jobasy aiasynda 15 myń qazaqstandyq túrli baǵyttar boiynsha tegin kýrstarda oqýdy aiaqtady, dep habarlaidy "Ult aqparat" atalmysh vedomostvonyń baspasóz qyzmetine silteme jasap.
Álemge áigili Coursera platformasy qazaqstandyqtardy oqytý úshin 2020 jylǵy 15 qyrkúiekten 2021 jylǵy 14 aqpanǵa deiingi kezeńge kvotalar bóldi. Jobany iske asyrý qorytyndysy boiynsha 15 myńnan astam azamat álemniń jetekshi sarapshylarynyń, oqý uiymdary men ýniversitetteriniń, sonyń ishinde GOOGLE, IBM, Facebook, Stanford University, Yale University, Johns Hopkins University, Princeton University jáne t. b. 500-ge jýyq kýrstarynan ótti. Jobaǵa qatysýshylar barlyǵy 335 myń saǵat oqýdan ótti, 3 myńǵa jýyq adam eki jáne odan da kóp kýrstardy aiaqtaǵan.
Qazaqstandyqtar arasynda IT jáne kompiýterlik ǵylymdar, biznes, tilderdi oqytý, gýmanitarlyq jáne áleýmettik ǵylymdar, jeke jamý siiaqty baǵyttar suranysqa ie boldy. TOP-5 kýrsqa «Teach English Now! Technology Enriched Teaching», «Programming for Everybody (Getting Started with Python)», «Business English: Basics», sonymen qatar «Jobalar men ónimdermen jumys jasaýdaǵy Agile men Scrum» jáne «Python-ǵa ený» kiredi.
Onlain oqytý, ásirese jastar arasynda tanymal boldy: bilim alýshylardyń eń kóp sany «26-dan 30 jasqa deiin» jáne «21-den 25 jasqa deiin» jas sanatyna jatady. Odan keiin «31-35 jas» jáne «20 jasqa deiingi» toptar.
Joba qatysýshylary kommýnikatsiia, kásipkerlik, kóshbasshylyq jáne menedjment, kompiýterlik baǵdarlamalaý, sondai-aq biznes-taldaý daǵdylaryn igerdi jáne damytty.
