Almaty oblysynda sintetikalyq esirtki óndirisin óristetken transulttyq qylmystyq topqa qatysty sot úkimi shyqty. Is materialdary bul jai ǵana qylmys emes, birneshe eldiń azamattary tartylǵan, júieli túrde jumys istegen jasyryn óndiristik jeli bolǵanyn kórsetedi, dep habarlaidy ult.kz.
Bas prokýratýranyń málimetinshe, qylmystyq top quramynda bolǵan 7 shetel azamaty sintetikalyq esirtki zattaryn óndirý jáne taratý isimen ainalysqan. Tergeý barysynda quqyq qorǵaý organdary 3 jasyryn zerthananyń ornyn anyqtaǵan.
Tintý kezinde tárkilengen zattardyń aýqymy istiń masshtabyn aiqyn kórsetedi: 90 kilogramnan astam daiyn psihotroptyq zattar, bir tonnadan asatyn prekýrsorlar men himiialyq komponentter, sondai-aq óndiristik jabdyqtar. Sarapshylar munyń «qara naryqtaǵy» qunyn shamamen 1,5 milliard teńgeden asady dep baǵalap otyr.
Bul – kezdeisoq jasalǵan áreket emes, kerisinshe, uiymdasqan, logistikasy bar, óndiris pen ótkizý tizbegi qalyptasqan júie. Iaǵni esirtki tek tutyný deńgeiinde emes, ónerkásiptik masshtabta daiyndalǵan.
Sot protsesinde memlekettik aiyptaýshy aiyptalýshylardyń kinásin dáleldeitin bultartpas derekterdi usynǵan. Nátijesinde sot olardy 19 jyldan 20 jylǵa deiin bas bostandyǵynan aiyrý jazasyna kesti. Sonymen qatar sottalǵandarǵa tiesili 3 turǵyn úi men avtokólikter memleket kirisine tárkilendi.
Quqyq qorǵaý organdarynyń málimeti boiynsha, bul jeli Almaty qalasy men Almaty oblysy aýmaǵynda esirtkiniń keń taralýyna tikelei qaýip tóndirgen. Jasyryn óndiris oshaqtarynyń áshkerelenýi aimaqtaǵy esirtki naryǵyna baǵyttalǵan soqqy retinde baǵalanyp otyr.
Degenmen bir iri toptyń joiylýy máseleni tolyq sheshpeidi. Sebebi mundai qurylymdar kóbine bir ortalyqtan basqarylatyn, biraq birneshe býynnan turatyn jeli retinde jumys isteidi. Sondyqtan bul is – tek sot zalynda aiaqtalǵan protsess emes, kóleńkeli naryqqa qarsy kúrestiń bir epizody ǵana.
Sot úkimi ázirge zańdy kúshine engen joq.
