10 sáýirge qaraǵan túni jumysqa shaqyrdy. Uiyqtap jatqan 4-synyp oqityn ulymdy, 1-synyp oqityn qyzymdy betterinen súiip, ekeýine qarap úiden shyǵyp kettim. Mine, sol ýaqyttan beri úige barmadym, deidi Mańǵystaý aýdany Shetpe aýylynyń dárigeri Oryngúl Muqanova.
Oryngúl Muqanova Mańǵystaý aýdandyq ortalyq aýrýhanasynda direktordyń emdeý isi jónindegi orynbasary bolyp qyzmet isteidi. 16 jyl jumys tájiribesi bar dáriger alǵash terapiia bóliminde ordinator, sodan soń birneshe jyl ýchaskelik terapevt, psihiatr, keiin emhananyń bólim meńgerýshisi bolǵan. Osy jyldar ishinde úiine birneshe kún barmai qalý bolmapty.
«Osyndai indetpen kezdesip, adamdardyń densaýlyǵy úshin kúresemiz dep oilamappyn. Qanshama kún uiqysyz júrsek te, úiimizge, bala-shaǵamyzdyń janyna baryp demalatynbyz. 2020 jyl bastalǵaly aty shýly indetti televizordan estidim jáne jelilerden kóre bastadym, basynda men de Qazaqstanǵa bul indet kelmeidi, Qytai qaida, biz qaida dep mán bermegen edim. Sebebi talai shoshqa tumaýy t.b. aýrýlardy estip júrmiz, biraq tap sol aýrýlar Qazaqstanǵa kelip, osynshama adam aýyrdy degendi estimedim. Bul indet endi Qazaqstanǵa jetti degende de Mańǵystaýǵa kelmeidi dep oiladym», - deidi Oryngúl Muqanova.
Mańǵystaýda eń alǵash kovid juqtyrǵan naýqas tirkelgenin estigende dáriger qatty qobaljypty.
«Bizge kelmeidi dep oilaýym múlde qate eken. Alǵash estigende mazam ketti. Ózi azǵantai ǵana halqy bar ólkemiz ǵoi. Bul indet myna turǵan Shetpege keledi dep te oilamaǵan edim. Biraq daiyndaldyq. 9 sáýirden 10 sáýirge aýǵan túni bas dáriger telefon soǵyp, shaqyrdy, osy indetti juqtyrǵan eki adam shyqqanyn aitqanda júregim soǵyp, aiaq qolym dirildep, ýaiymǵa salyndym», - deidi dáriger.
Osylaisha, ol sol túni ketkennen áli úiine barmaǵan.
«Uiyqtap jatqan 4-synyp oqityn ulymdy, 1-synyp oqityn qyzymdy betterinen súiip, túngi saǵat 01:15-te úiden shyǵyp kettim. Mine, sol ýaqyttan beri úige barmadym.
Balalarym suraidy: mama úige nege kelmeisiń, bizdi ájemizdiń úiinen nege alyp ketpeisiń dep. Árine ózim úshin emes, balalar úshin ǵana qinalam, olardyń sabaqtaryn qadaǵalaý bar», - deidi Shetpelik maman.
Dáriger óziniń áriptesteriniń eńbegin de atap ótti. Qyzmette qatar júrgen aq halattylardyń bar kúshin salyp, kovidpen kúresýde ekenin aitty.
«Ózimniń áriptesterim Janaidar, Erbolat, Erbol, Jánibek, Berikqali, Saǵitjan jáne birneshe meiirbikeler men kishi qyzmetkerler de osy indetpen kúreste aldyńǵy shepte, otbasylarynan alshaqta júr. Árine, adam balasy bolǵasyn ýaiymdaimyz, saǵynamyz. Biraq biz tańdaǵan mamandyq eshqandai syltaýdy qabyldamaidy. Biz osy mamandyqty moiynsunyp, elge qyzmet etemiz dep ant bergennen soń, sol mindetimizdi oryndaý paryzymyz. Áriptesterime rahmet aitamyn, shydamdylyqtaryna, sabyrlylyq tanytyp jatqandaryna. Biz birgemiz!
Biz sizder úshin jumystamyz. Al sizder mamandardyń aitqanyna qulaq asyp, kez kelgen alyp-qashpa áńgimege mán bermei, úide bala-shaǵańyzben birge bolyńyzdar! Árbir sáttiń qadirin bileiik, aǵaiyn!
Qazirgi tańda biz úide bolýdy ańsap otyrmyz! Barlyǵymyz birge osy jaman indetti jumylyp qana jeńemiz! Naýqastar tezirek jazylyp ketsinshi dep tileiik, sany kóbeimesin dep tileiik. Ol úshin karantindi durys túsinip, sanaly túrde óz-ózimizdi aldamaiyq aǵaiyn. Bári jaqsy bolady. Áli talai jaqsy kúnderde jolyǵaiyq!»,-deidi Oryngúl Muqanova.
