Armeniia 15 qarashadan daýly jerlerdi Ázerbaijanǵa tapsyrýdy bastaýy tiis. Ózin táýelsiz dep jariialaǵan Taýly Qarabaq aimaǵyndaǵy alty aptaǵa sozylǵan qaqtyǵysty toqtatý maqsatynda Armeniia, Ázerbaijan jáne Resei qol qoiǵan bitim kelisiminiń sharty osyndai.
Azatyqtyń Armian qyzmetiniń habarlaýynsha, ondaǵan jyl boiy etnikalyq armiandardyń baqylaýynda bolǵan Kelbadjar aýdanynyń turǵyndary keter aldynda úilerin órtegen.
1990 jyldary Sovet odaǵy taraǵannan keiin Ázerbaijan quramyndaǵy kóbine armiandar qonystanǵan Taýly Qarabaq derbestikke umtylyp, munyń sońy qarýly qaqtyǵysqa, eki jaqtan da bosqyndardyń aǵylýyna alyp kelgen. Soǵysqa deiin kóbine ázerbaijandar turǵan Kelbadjar aýdanynyń halqy bosyp ketken soń mundaǵy úiler bos qalǵan. Ol úilerge armiandar kelip qonystanǵan.
Kelbadjardy Ázerbaijanǵa tapsyrardyń aldynda armiandar Dadivank monastyryna baryp duǵa oqydy. 14 qarashada monastyr mańyna Resei bitimgerleri kelip ornalasty.
Kremldiń resmi aqparatyna sáikes, Resei prezidenti Vladimir Pýtin Ázerbaijan prezidenti Ilham Álievti Taýly Qarabaqtaǵy Bakýdiń baqylaýyna ótetin aimaqtaǵy hristiandardyń qasietti oryndaryn qorǵaýǵa shaqyrǵan.
Ázerbaijan prezidentiniń baspasóz qyzmeti hristiandardyń jádigerlerin saqtaýǵa sendirgen málimdeme taratty.
Bitim kelisiminiń basty sharttarynyń biri – aldaǵy 2,5 aptada Armeniia Kelbadjar men taǵy eki aýdandy Ázerbaijanǵa qaitarýy tiis. Kelbadjar siiaqty ol eki aýdan da 1994 jyly soǵys toqtaǵaly armiandardyń baqylaýynda bolǵan.
10 qarashadaǵy bitim kelisimi alty aptalyq soǵysty toqtatýy tiis. Kei málimetter boiynsha, osy aralyqta eki jaqtan 5 myńǵa jýyq soldat qaza tapqan. Armiandar arasynda bul kelisimge narazylyq bildirgender kóp boldy, sebebi Taýly Qarabaqtyń kóp bóligi jáne oǵan japsarlas aimaqtar soǵys kezinde Ázerbaijannyń baqylaýyna ótken.
Bul kelisim boiynsha aimaqqa Reseidiń 2 myń bitimgeri ornalasady. Alǵashqy 200 sarbaz bitim týraly habarlana salysymen Armeniiaǵa ushyp keldi.
14 qarashada eki tarap qaza tapqandardyń máiitterimen almasty.
Baký Kelbadjar aýdanynan ásker men beibit turǵyndardy shyǵarý merzimin 15 qarashadan 25 qarashaǵa shegerý týraly ótinishke "gýmanistik turǵyda" kelisim bergenin málimdedi.
