QR Bilim jáne ǵylym ministrliginiń Bilim jáne ǵylym salasyndaǵy sapany qamtamasyz etý komiteti barlyq qazaqstandyq kolledjdiń bilim berý qyzmetine monitoring júrgizip jatyr.
Taldaý nátijeleri boiynsha 145 bilim berý uiymy 330 mamandyq boiynsha litsenziiaǵa qosymshalaryn óz erkimen qaitaryp berdi (belgili bir mamandyqtar boiynsha oqytýǵa ruqsat beretin qujat).
QR BǴM Bilim jáne ǵylym salasyndaǵy sapany qamtamasyz etý komitetiniń tóraiymy Gúlzat Kóbenova stýdentterge kórsetiletin qyzmetterdiń sapasyn jaqsartýǵa baǵyttalǵan jumys Tehnikalyq jáne kásiptik bilim berý uiymdarynyń direktorlarymen birlese júrgizilgenin atap ótti.
«Departamentterimiz kolledjderdiń bilim berý qyzmetine monitoring júrgizip jatyr. Birinshi kezekte biz oqý protsesine qajetti qural-jabdyqtardyń, ádebietterdiń, bilim beretin tiisti oqytýshylardyń bolýyna, oqýǵa barlyq jaǵdaidyń jasalýyna nazar aýdaramyz.
Osy jumystyń nátijesinde kolledjder qazirgi ýaqytta ózderiniń bilim berý profiline jatpaityn nemese biliktilik talaptaryn saqtai almaityn jekelegen mamandyqtar boiynsha litsenziianyń qosymshalaryn qaitarý týraly sheshim qabyldady. Arasynda eńbek naryǵynda suranysqa ie emes mamandyqtar da bar.
Keibir kolledjderge belgili bir mamandyqtar boiynsha stýdentter oqýǵa múldem túspegen. Mysaly, pedagogikalyq kolledj menedjerlerdi daiarlaýǵa talpynsa, al ekonomikalyq baǵytta bilim beretin kolledj pedagogterdi oqytpaq bolǵan.
Sondai-aq keibir oqý oryndary materialdyq bazasy sai kelmese de belgili bir mamandyq boiynsha kadrlardy daiyndaǵysy kelgen. Qazirgi ýaqytta stýdentter oqýyn aiaqtady, ol úshin kolledjderge múmkindik berildi. Budan bylai 145 tehnikalyq jáne kásiptik bilim berý uiymy úsh júzden astam mamandyq boiynsha stýdentterdi oqytpaityn boldy. Sondyqtan ata-analar men oqýshylarǵa alańdaýdyń qajeti joq. Eshqandai problema týyndaǵan joq», – dedi QR BǴM Bilim jáne ǵylym salasyndaǵy sapany qamtamasyz etý komitetiniń tóraiymy Gúlzat Kóbenova.
