Qazaqstanda 39 memlekettik járdemaqynyń 14 túri endi azamattardyń muqtajdyq deńgeiine qarai taǵaiyndalady, dep habarlaidy ult.kz.
Mán-jaidy Eńbek jáne halyqty áleýmettik qorǵaý ministrligi málimdedi.
“Ózgerister Otbasynyń tsifrlyq kartasy boiynsha ál-aýqat deńgeii “A” jáne “V” sanatyna, iaǵni ál-aýqaty joǵary jáne aýqatty otbasylarǵa jatqyzylǵan járdemaqy alýshylarǵa ǵana qatysty”, – dep habarlady ministrlik.
Jańa tártip boiynsha muqtajdyq deńgeii eskeriletin tólemderdiń qataryna:
- bala týýǵa bailanysty járdemaqy;
- kópbalaly otbasylarǵa beriletin járdemaqy;
- múgedektigi bar adamdarǵa kútim jasaityn ata-analar men basqa da azamattarǵa beriletin tólemder;
- múgedektik boiynsha járdemaqy;
- asyraýshysynan aiyrylý jaǵdaiy boiynsha járdemaqy;
- jerleýge beriletin tólem;
- soǵys ardagerlerine, qaza tapqan áskeri qyzmetkerlerdiń otbasylaryna jáne memlekettik ataqtarǵa ie azamattarǵa beriletin keibir arnaiy memlekettik járdemaqylar bar.
Ministrlik jańa tártip barlyq tólemge birdei qoldanylmaitynyn aitty. Ár járdemaqy jeke qarastyrylady.
“Jańa tártip tólemniń naqty túrine qarai qoldanylady. Alaida bul barlyq járdemaqyny alý quqyǵy avtomatty túrde saqtalady degendi bildirmeidi. Mysaly, birinshi toptaǵy múgedektigi bar adam múgedektik boiynsha járdemaqy alyp júrse, bul tólem saqtalady. Al eger keiin onyń basqa tólem alýǵa, mysaly, bala týýyna bailanysty járdemaqy alýǵa quqyǵy paida bolsa, ol tólem muqtajdyq deńgeii eskerilip taǵaiyndalady”, – dep túsindirdi ministrlik.
Vedomstvo málimetinshe, ár tólem jeke qarastyrylyp, áleýmettik qoldaý naqty kómekke muqtaj azamattarǵa baǵyttalmaq.
