Foto: ashyq derekkóz
13 maýsym keshinen bastap Izrail tórt ret shabýylǵa ushyrady: Tel-Aviv, Ierýsalim, Beer-Sheva, Gýsh-Dan jáne basqa da qalalarda jarylystar boldy. Jarylystar Iran aýmaǵynda da tirkeldi, dep habarlaidy Ult.kz.
Izraildiń N12 telearnasy alǵashqy úsh shabýyl tolqynynan keiin Iran 150–200 raketa ushyrdy dep habarlady. Keiinirek Izrail Qorǵanys armiiasy shamamen 100 raketa atylǵanyn rastady, olardyń kópshiligi bógelip, nysanalarǵa jetpegenimen, TsAHAL soqqylardyń bir bóligi dittegen jerine tigenin málimdedi. Tórtinshi tolqynda Iran ondaǵan zymyrandy Izrailge baǵyttaǵan.
Islam revoliýtsiiasy korpýsy bas qolbasshysynyń keńesshisi, general Ahmad Vahidi Iran 150-den astam nysanǵa soqqy jasaǵanyn aitty. Buǵan Izraildiń F-35, F-16 jáne F-15 joiǵysh ushaqtary, janarmai quiý jáne júk tasityn ushaqtary ornalasqan áýe bazalary, sondai-aq osy bazalardaǵy basqarý ortalyqtary men radioelektrondyq soǵys júieleri kirgen. Sonymen qatar, Izraildiń zymyran jasaý ortalyqtary men basqa áskeri-ónerkásiptik nysandaryna da soqqylar jasalǵan. KSIR qolbasshysynyń aitýynsha, Iran ballistikalyq raketalardy tipti sýasty qaiyqtarynan da ushyrǵan. Irandyq raketalardyń ondaǵany óz nysanalaryna dál tigen.
AQSh Irannyń shabýylyna qarsy turýda Izrailge kómek kórsetken. The Washington Post basylymynyń málimetinshe, Patriot jáne THAAD zymyranǵa qarsy júieleri paidalanylǵan. CNN dereginshe, Iran Izraildi qorǵaityn kez kelgen eldiń bazalaryna soqqy jasaitynyn eskertken.
Izraildegi adam shyǵyny týraly aqparat ártúrli. Ynet 2 adam qaza tapqanyn, 20-ǵa jýyq adam aýrýhanaǵa jetkizilgenin habarlaidy. Jerusalem Post keminde 63 adam jaralanǵanyn, bir adamnyń qaitys bolǵanyn jazady. Keminde alty ǵimarat zaqymdanǵan. Tel-Aviv okrýginiń qolbasshysy Irannyń soqqysy "materialdyq jaǵynan orasan zor shyǵyn ákelgenin" málimdedi.
Irandyq Mehr agenttigi el aýmaǵynda qulaǵan Izraildiń F-35 joiǵysh ushaǵynyń fotosyn jariialady. Iran armiiasy eki joiǵyshty atyp túsirgenin aitsa, TsAHAL bul málimetti, sondai-aq ushqyshtyń tutqyndalǵany týraly aqparatty joqqa shyǵardy.
Irannyń Isfahan qalasynda, iadrolyq nysan ornalasqan mańda qatty jarylys boldy. Tegeranda da jarylystar estildi, Mehrabad áýejaiynyń shabýylǵa ushyraǵany habarlandy.
Izrail shabýyly kezinde irandyqtar dini meiramǵa daiyndyqtaryn jalǵastyryp jatqan — túngi úsh shamasynda Tegerandaǵy Imam Homeini alańynda adamdar áýe shabýylynan qorǵaný jaǵdaiynda Qadir Hom meiramyn qarsy alýǵa daiyndalyp jatqan videolar tarady.
Irannyń BUU janyndaǵy turaqty ókili Amir Said Iravani Izrail agressiiasyn "soǵys jariialaý" dep atady. Onyń aitýynsha, keiingi shabýyldar saldarynan Iranda 78 adam qaza taýyp, 320-dan astam adam jaraqat alǵan.
