Prezidenttiń jala jabý týraly bapty dekriminalizatsiialaý jónindegi ustanymy qýantady. Ulttyq qoǵamdyq senim keńesiniń múshesi, Qazaqstan Media Aliansynyń tóraǵasy Armanjan Baitasov búgingi Ulttyń keńestiń otyrysy týraly pikirin osylai bildirdi, dep habarlaidy QazAqparat.
«Jalpy men úshin óte jaqsy áser boldy, bul otyrys. Búgin mańyzdy kezdesý boldy dep sanaimyn. Óitkeni, Ulttyq senim keńesiniń músheleri arasyndaǵy, sondai-aq ártúrli komitetterde talqylanǵan usynystar Prezidenttiń baiandamasynda qandai da bir túrde kórinis tapty», - dedi Armanjan Baitasov.
Sarapshy saiasi reformalarǵa, onyń ishinde saiasi partiialarǵa qatysty jáne mitingilerge qatysty eskertýler sipatyna erekshe nazar aýdardy.
«Biz qazir birtindep damyp jatqan elmiz, reforma turǵysynan alǵanda damý evoliýtsiialyq túrde júrip jatyr. Biz ózara kelisimge kelip, reformalardyń eń durys jáne túsinikti joldaryn izdestirip jatyrmyz. Bul óte mańyzdy», - dep atap ótti Media Alians basshysy.
Sondai-aq onyń paiymynsha, QR Qylmystyq kodeksi 130-babynyń (Jala jabý) qylmystyq sipat dep tanylmaýy jýrnalister jumysynyń múmkindikterin keńeitetin bolady.
«130-bapqa qatysty aitar bolsam, jýrnalist retinde, media salasynyń qyzmetkeri retinde, Qazaqstan Media Aliansynyń tóraǵasy retinde, árine, osy baptyń qylmystyq sipattan alyp tastalatyny qýantady. Óitkeni sóz bostandyǵy, meniń oiymsha, memlekettiń turaqty damýyna yqpal etedi. Osy baptyń dekriminalizatsiialanýy jýrnalisterdiń batyl jumys isteýine múmkindik beredi. Jýrnalistik zertteýler qaita shyǵa bastaidy, jýrnalister sapaly materialdar daiyndaýǵa umtylady. Sosyn bizdiń de jýrnalisterdi kóp oqi bastaidy. Sondyqtan da, 130-bapty qylmystyq sipattan alyp tastaý týraly sheshim óte mańyzdy boldy dep sanaimyn», - dedi Armanjan Baitasov.
Eske sala keteiik, búgin Nur-Sultan qalasynda Ulttyq qoǵamdyq senim keńesiniń ekinshi otyrysy ótip, onda Memleket basshysy Qasym-Jomart Toqaev sóz sóilegen bolatyn.
