Elbasynyń tapsyrmasy boiynsha «Nur Otan» partiiasy jáne Tuńǵysh Prezident Qorynyń qoldaýymen «Birgemiz» qory muqtaj qazaqstandyqtarǵa ataýly kómek kórsetýdi jalǵastyrýda, dep habarlaidy "Ult aqparat".
Búginge deiin 200 myńnan astam otbasy azyq-túlik sebetteri men birinshi kezekte qajetti taýarlar aldy. 362 myń otbasyna 50 000 teńgeden tólenip, bul jalpy 1,3 millionnan astam qazaqstandyqty qamtydy.
Júrgizilip jatqan jumystyń aralyq nátijeleri týraly beinerolikti «Nur Otan» partiiasy Tóraǵasynyń birinshi orynbasary Baýyrjan Baibek óziniń Instagram paraqshasynda jariialady.
Sondai-aq, nurotandyqtar Túrkistan oblysyndaǵy sý tasqynynan zardap shekken aýyldardyń turǵyndaryna belsendi túrde kómek kórsetýde. «Nur Otan» partiiasynyń barlyq filialdarynan azyq-túlik, kiim-keshek, qurylys materialdary jáne jeke gigiena quraldary túrindegi 1000 tonnadan astam gýmanitarlyq kómek jiberildi.
«Memleket basshysy Qasym-Jomart Toqaev atap kórsetkendei, sý tasqynynan zardap shekken turǵyndar tolyqtai qaita jóndeýden ótken nemese jańa salynǵan úilermen qamtamasyz etiledi. Áleýmettik nysandardy, injenerlik jeliler men joldardy qalpyna keltirýge 14 milliard teńgeden asa qarajat bólindi. Tuńǵysh Prezident Nursultan Nazarbaevtyń bastamasymen «Birgemiz» qory da qosymsha kómek kórsetedi. Qor Dostyq aýylynyń zardap shekken barlyq turǵynyn jańa baspanamen qamtamasyz etedi. Atap aitqanda, olar úshin Myrzakent eldi mekeninde 20 úi salynady», - delingen beinerolikte.
Aita keteiik, buǵan deiin «Nur Otan» partiiasy Tóraǵasynyń birinshi orynbasary oblys ákimi Ómirzaq Shókeevpen birge bólingen jerlerdi arnaiy baryp aralap, jergilikti turǵyndarmen kezdesken edi. Bul jerde saman kesekten turǵyzylǵan úilerdiń ornyna gaz bloktarynan aýdany 100 sharshy metrdi quraityn 4 bólmeli úiler salynady. Osy maqsatta Qamqorshylyq Keńestiń sheshimimen «Birgemiz» qorynan 340 million teńge bólindi. Baýyrjan Baibek qurylys jumystarynyń sapasy avtorlyq jáne tehnikalyq baqylaý salasyndaǵy mamandardyń qatysýymen, erekshe partiialyq baqylaýda bolatynyn atap ótti.
.jpeg)