Aýyl sharýashylyǵynda halyqtyń tabys kózin arttyratyn 77 myń turaqty jumys orny qurylady. Bul týraly búgin Úkimet otyrysynda QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«Birqatar oblysta iske asatyn jer sýarý keshenderin jańartý jumystary sýarmaly jer kólemin ulǵaityp, halyqtyń eginshilik, mal sharýashylyǵymen ainalysý múmkindikterin keńeitedi. Esep boiynsha bul jobalar aýyl sharýashylyǵynda bolashaqta halyqtyń tabys kózin arttyratyn 77 myń turaqty jumys ornyn qurýǵa septigin tigizedi», - dedi ministr.
Onyń atap ótýinshe, gazben, sýmen, elektr qýatymen qamtý jańa jobalary turǵyn úi qurylysyna serpin berýge, aýyldyqtarǵa kommýnaldyq qyzmetterdi alýyna múmkindik jasaidy.
«Óńirlerde jol kartalaryn iske asyrý bastalyp ketti. Barlyǵy 6 506 jobanyń ishinde 2 410 jobasy respýblikalyq biýdjet esebinen iske asyrylady. Tiisti qarajat bólingen. Sol jobalardyń basym bóligi boiynsha 1 mamyrda memlekettik satyp alý konkýrstary aiaqtalyp, merdigerler anyqtaldy. Bul baǵytta Jambyl, Shyǵys Qazaqstan, Pavlodar, Almaty, Túrkistan oblystary alda kele jatyr. Almaty, Shymkent qalalary men Qyzylorda olblystarynyń qarqyny tómen. 1 mamyrdaǵy jaǵdai boiynsha birqatar óńirde 1265 jobamen jumys bastalyp ketti. 17 myńnan astam jumys orny qurylyp, 10 300 jumysshy qabyldandy», - dedi Birjan Nurymbetov.
