Ońtústik Koreianyń eks-prezidenti Pak Kyn Hege jáne Lotte Group tóraǵasy Sin Don Binge para aldy degen aiyp taǵyldy, - dep habarlaidy RIA Novosti Renhap agenttigine silteme jasap.
Agenttiktiń málimetinshe, Pak Kyn Hege 14 pýnkt boiynsha aiyp taǵylǵan, olardyń ishinde jemqorlyq, úshinshi tulǵalardan para alý, ókilettigin paidalana otyryp, úshinshi tulǵalardyń isine aralasý jáne eriksiz kóndirý, bótenge resmi qupiia aqparatty ashý jáne basqa aiyptar bar.
"Aiyptaýshy tarap eks-prezident ońtústikkoreialyq iri korporatsiialardan, onyń ishinde Samsung jáne Lotte korporatsiialarynan jalpy somasy 59,2 milliard ońtústikkoreialyq von (52,02 million dollar) para alǵan dep esepteidi. Pak Kyn He qamaýda. Lotte Group tóraǵasy Sin Don Binge úshinshi tulǵalardyń qatysýymen jemqorlyq is-áreketter jasady degen aiyp taǵylǵan. Alaida ońtústikkoreialyq korporatsiianyń basshysy ustalǵan joq", - dep jazady basylym.
Eske salaiyq, 2016 jyldyń kúzinde Ońtústik Koreiada el biligine qatysty daý shyqty. Paraqorlyq isi boiynsha eks-prezidenttiń qurbysy Tsoi Sýn Sil ustalǵannan keiin Pak Kyn Hege impichment jariialanyp, naýryz aiynyń basynda Konstitýtsiialyq sot onyń qyzmetten ketýi týraly sheshim shyǵardy. 9 mamyrda elde prezident sailaýy ótedi. Prokýratýra eks-prezidentke qatysty naqty bir sheshimge naýryz aiynyń sońynda kelýi múmkin.
Tsoi Sýn Silge koreialyq iri kompaniialardan 70 million dollar bopsalady jáne 13 is boiynsha saiasi protsesterge aralasty degen aiyptar taǵyldy. Onyń ishinde Samsung korparatsiiasynyń basshysy Li Chje En óziniń kompaniiasyna tiimdi jaǵdai ornatýy úshin Tsoi Sýn Silge 37 million dollar para bermekshi bolǵan delinedi. Samsung kompaniiasynyń basshysy Li Chje En aqpan aiynyń sońynda ustaldy.
