Shymkentte qulaǵan úi týraly oqiǵanyń mán-jaiy belgili boldy, - dep habarlaidy kaz.tengrinews.kz "Ońtústik" óńirlik qolbasshylyǵynyń baspasóz qyzmetine silteme jasap.
Aita keteiik, 2017 jyldyń 8 qańtarynda shamamen saǵat 03.30-da Shymkent qalasynda Halyqtar dostyǵy kóshesinde ornalasqan eki qabatty úilerdiń birinde gaz ballony jarylyp, eki qabatty úi qiraǵan. Aita keteiik, úi tolyqtai qirap, jaramsyz bolyp qalǵan.
QR Ulttyq ulan 6506 áskeri bóliminiń áskeri qyzmetshisi Bahramov Rýslan oqiǵa bolǵan úidiń mańynda turady eken. Ol jarylysty estip, kóshege júgirip shyqqan. Osy sátte qiraǵan úi jaqtan balanyń jylaǵan daýsy estiledi. Rýslan Bahramov áieline jedel járdem men órt sóndirý qyzmetine qońyraý shalýdy buiyryp, aiǵai estilgen jaqqa júgirgen.
Baspasóz qyzmetiniń málimetinshe, Rýslan Bahramov der kezinde batyl áreket etip, úiindiniń astynan Jumalievter otbasyn alyp shyqqan. "D.D.Jumaliev, onyń áieli, bir jasar qyzy jáne áieliniń sheshesi dalaǵa shyǵarylǵan, alaida Jumalievtiń áieli alǵan jaraqatynan qaza tapty", - delingen habarlamada.
Otbasyny úiindi astynan alyp shyqqan starshinany marapattaý týraly usynys jasalǵany aitylady.
Aita keteiik, osyǵan deiin apat-qutqarý sharalary barysynda OQO Tótenshe jaǵdailar departamentiniń qyzmetkerleri - 23 adam jáne 3 arnaiy tehnika, apatty-qutqarý jasaǵynyń 44 adamy jáne 6 arnaiy tehnikasy (olardyń ishinde kinolog mamandar men itter, meditsinalyq-psihologiialyq qyzmettiń mamandary), órt sóndirý jáne apatty-qutqarý jumysynyń - 17 adamy men 4 arnaiy tehnikasy, Apatty meditsinalyq ortalyǵynyń 3 qyzmetkeri, 4 jedel járdem kóligi quramynda 16 adam jáne 4 arnaiy tehnika tartylǵany habarlanǵan edi.
OQO IID 30 qyzmetkeri oqiǵa bolǵan jerdi qorshaýǵa alyp, sonymen qatar 4 energetika jáne gaz salasynyń mamandary osy aýdandaǵy elektr qýaty men gazdy óshirgen edi.
